Өмнөд Солонгосын жижиг, дунд үйлдвэрлэлийн төлөөлөгчид Польш, Швед улсуудад айлчилж экспортын боломжийн талаар зөвлөлдсөн тухай “Yonhap News” мэдээлж байна. Солонгосын ЖДҮ холбооны хүмүүс нэр гарсан хоёр улсад зургаадугаар сарын 11-ээс 16-нд айлчлахдаа 53,13 сая долларын бараа бүтээгдэхүүн экспортлон оруулж ирэх талаар 141 уулзалт, зөвлөгөөн зохион байгуулжээ.
Энэ хоёр улсыг зүгээр нэг сонгоогүй гэдгээ ЖДҮ холбоо тайлбарласан байна. Польш нь Зүүн болон Төв Европт хамгийн том зах зээлтэй улс бөгөөд тус улсад экспортлон оруулж ирсэн Өмнөд Солонгосын бараа, бүтээгдэхүүнийг хөрш зэргэлдээ бүс нутаг дахин экспортлох боломжтой. Харин Швед нь Өмнөд Солонгосоос импортлодог барааныхаа тоо хэмжээг хурдацтай нэмэгдүүлж байгаа.
Өмнөд Солонгосын ЖДҮ холбооны төлөөлөгчид “Эрэлт буурч, экспорт суларснаас болж манай улсын байдал тийм ч сайнгүй байгаа. Бидэнд экспортын шинэ зах зээл маш ихээр шаардагдаж байна. Иймээс бүтээгдэхүүнээ хөгжиж буй зах зээлүүдэд гаргахын тулд шаардлагатай бүхнийг хийх болно” гэжээ.
Сэтгэгдэл (0)
Сэтгэгдэл бичигдээгүй байна