Италийг дөрөв дэх удаагийн их халууны давлагаа нөмрөн авсны улмаас тус улсын 27 том хотын 11-д нь цаг агаарын аюулын хамгийн дээд түвшний сэрэмжлүүлэг зарлажээ.Үүнтэй холбоотойгоор Италийн Эрүүл мэндийн яамнаас гаргасан анхааруулгад Ром, Флоренц, Болонья, Триест, Перужа зэрэг том хотуудын агаарын дулаан 40 градус хүрч халах тухай иргэдийг сэрэмжлүүлжээ. Долоо хоногийн эхэнд Италийн хойд болон төв хэсэгт хамгийн их халах бол мягмар гарагт хэт халуун өмнөд нутагт хүрэх аж.
Цаг агаарын аюулын хамгийн дээд "улаан" түвшний сэрэмжлүүлэг гэдэг нь цаг агаарын өөрчлөлт нь хүүхэд, хөгшчүүл гэсэн эрсдэлийн бүлгийн хүмүүс төдийгүй эрүүл, идэвхтэй хүмүүсийн эрүүл мэнд, амь насанд аюул учруулах хэмжээнд хүрсэн гэдгийг иргэдэд анхааруулдаг. Ийм нөхцөлд өдрийн халуунд гадагш гарахгүй байх, шингэн юм их уухыг зөвлөдөг, ялангуяа архаг хууч эмгэгтэй хүмүүст онцгой анхаарах хэрэгтэй болдог.Энэ жилийн зун Өрнөд Европын хувьд цаг агаарын ажиглалт хийж эхэлснээс хойших хамгийн халуун улирал болж, дээд амжилт тогтоогоод байгаа юм.
Сэтгэгдэл (0)
Сэтгэгдэл бичигдээгүй байна