Н.Алтанхуяг: Шударга юм хэлсэн хүнийг шоронд хийдгээ боль, Н.Өнөрцэцэгийг гаргаач

УИХ-ын чуулганы хуралдаан дээр УИХ-ын гишүүн Н.Алтанхуяг дараах байр суурийг илэрхийллээ. 

Тэрбээр "Өчигдөр та хэд ярьж байгаад сонгуулийн тойргоо томсгоод баталчих шиг боллоо. Бүс нутгаа бодож байна уу, ялахаа бодсон уу. Би тэр тухай ярихгүй. Гурван зүйлийг л хэлье. Нэгдүгээрт, шударга явуулмаар байна. Хар машинаар тоолмооргүй байна. Гэхдээ техник хэрэгсэл ашигламаар байна. Тэр нь камер ашиглаад гадна байгаа хүмүүс давхар тоолохоор хоншоортой юм хийж болох уу? Намууд сонгуулиа шударга явуулмаар байна. Хоёрдугаарт мөнгө. Та нарын мөнгө томсгосон тойрог дээр нийлвэл дийлдэхгүй дээ. Тиймээс 200 хүн хүртэлх нэг ухуулагч ажилдаг байдлыг хасаад өгөөч. Маш их мөнгө гардаг. 200 хүртэлх сонгогчид нэг ухуулга гаргахаар сая доллар гардаг. Энийг хасаад өгөөч. Мөнгөтэй хүний эсрэг мөнгөгүй хүн үзнэ гэдэг тогтворгүй тулаан. 

Нүүрсний мөнгө гээд та нар нуугаад л байгаа. Сурталчилгааны материал хэвлүүлэхээс эхлээд хязгаарлалт тавимаар байна. Сумын төвд нэг самбар тавихад л хангалттай. Сонгуулиар зардал гаргахаар сонгогдоод хусдаг л систем яваад байна. Гуравдугаарт, залууст боломж олгомоор байна. Атамандаад, төрөөс мөнгө хусмааргүй байна. Төгсгөлд нь хэлэхэд Монголын нийгэмд үг хэлдэг хүмүүсийг хавчиж, шоронжуулж, дээрэлхэхээ болимоор байна. Үг хэлэх эрх чөлөөний төлөө би үхэн үхтлээ тэмцэнэ гэж гарч ирсэн. Мөнх-Эрдэнийг гаргаач. Магадлангийн хугацаа дуусахаас нь өмнө нэг шалтаг гаргаад зөрчил гаргасан болгоод байна. Та нар 65-уулаа байгаа шүү дээ. Шударга юм хэлсэн хүнийг шоронд хийдгээ боль. Н.Өнөрцэцэгийг гаргаач. Та нар удахгүй бүгд шоронд орно шүү. Хүн нь байвал хэрэг нь олдоно гэдэг. Ямар ч байхгүй юмыг юм болгодог. Би өөрөө 5-6 жил шалгагдаж байсан. Ямар ч хэргийг тохдог. Үүнийгээ боль. Би ийм нийгмийн төлөө яваагүй.Хүмүүсийг хэлмэгдүүлдэгээ боль. Томсгосон тойрог дээр хүч, мөнгөө нэгтгээд шударга бус юм хийв ээ та нар" гэлээ.