СҮХБААТАР баг цувралыг итгэл төгс тэргүүлж байна

МСБХ-ны М Хөгжлийн Лигийн эрэгтэй плей-оффын эхний шатанд учраа таарсан Сүхбаатар болон Мазаалай багуудын цувралын харьцаа 2:0 болж Сүхбаатар баг итгэл төгс тэргүүлж эхэллээ.

Сүхбаатар баг улиралд баруун бүсийг тэргүүлж плей-оффт 1-р байраар шалгаран амжилтаараа 4-р байраар шалгарсан Мазаалай багтай учраа таарсан юм.

Цувралын эхний тоглолтод Сүхбаатар баг тоглолтын эхнээс багаараа маш жигд тоглолтыг үзүүлж онооны тэргүүллээ хадгалан хожил байгуулсан билээ. Тус тоглолтод Сүхбаатар багаас А.Баярхүү 28 оноо авч бүх тоглогчдыг тэргүүлсэн бол багийн хамтрагч О.Ганзориг будагтай талбайд сайн тоглолтыг үзүүлж 9 оноо 10 самбар авч багаа хожил авахад том нөлөө үзүүлсэн.

Уламаар хоёр багийн цувралын 2 дах тоглолт 3-р үе хүртэл эн тэнцүү болж өндөрлөсөн. Гэвч шийдвэрлэх 4-р үеийн сүүлийн 2 минутад Сүхбаатар баг туршлагатай тоглогчидтой мөн баруун бүсийн тэргүүн баг гэдгээ батлан харуулж багаараа найдвартай хамгаалалт довтолгоог гүйцэтгэж эцсийн мөчид ялалт байгуулснаар цувралыг 2:0 харьцаатай болгон тэргүүлсэн хэвээр үлдсэн юм.

Хоёр багийн цувралын 3 дах тоглолт ирэх амралтын өдрүүдээр буюу 12-р сарын 30-нд Спортын төв ордонд явагдана. Тус тоглолт хоёр багийн хувьд маш чухал тоглолт бөгөөд ялангуяа залуу бүрэлдэхүүнтэй Мазаалай баг заавал хожиж байж цувралаа үргэлжлүүлнэ. Харин Сүхбаатар баг хожил байгуулбал Бүсийн финалд шалгарах юм.