ӨВЧТЭЙ ХҮҮХДҮҮДИЙН ТӨЛӨӨ ХАГАРХАЙ ШИЛЭН ДЭЭР ХӨЛ НҮЦГЭН АЛХАВ

Өмнөд Африкийн илбэчин Руссель Фокс 32 км үргэлжлэх хагархай шилэн дээгүүр хөл нүцгэн алхаж, Геннисийн дээд амжилт тогтоожээ. 43 настай Фокс энэ аюултай үзүүлбэрийг 29 цагийн дотор гүйцэтгэж дуусгасан байна.

Тэрээр өгөгдсөн даалгаврыг амжилттай гүйцэтгэхийн тулд үзэгчдийн сэтгэл хөдлөл, хариу үйлдлийг үл анхааран оюун санаагаа сайтар төвлөрүүлж, дотроо бясалгаж байсан тухайгаа сэтгүүлчдэд ярьжээ. Үзүүлбэрийг сонирхолтой болгох үүднээс хоёр цаг тутамд хагарсан шилийг сольж, ирмэг нь хурц байгаа эсэхийг шалгаж байжээ.

Түүний Геннисийн амжилт тогтоох болсон гол шалтгаан нь аутизм, булчингийн дистрофи, ургийн архины хордолтын синдромтой хүүхдүүдийн төлөө үйл ажиллагаа явуулдаг"Nosh for Josh" сангийн хөрөнгийг өсгөх явдал юм. Ингэснээр өвчтэй хүүхдүүдийг Энэтхэгийн "NeuroGen" хэмээх тархи, нурууны судалгааны төвд эмчилгээнд хамруулах зорилготой ажээ. Фокс өөрөө татаж унадаг өвчтэй тул хүүхдүүдийг сайн ойлгож, тэдний төлөө бүх сэтгэл зүрхээ зориулдаг байна.