ЖООМНУУД ГАМШИГТ ӨРТСӨН ХҮМҮҮСИЙГ АВАРНА

Жоомнуудыг бөөнөөр нь алж устган, жихүүцэж дургүйцэхээс илүүтэй баярлаж талархах цаг иржээ. Учир нь АНУ-ын Хойд Каролины их сургуулийн эрдэмтэд аврах ажиллагаа гүйцэтгэж буй хүмүүсийн хөдөлмөрийг хөнгөвчлөх зориулалттай "хиймэл жоомнуудыг" амжилттай туршсан байна.

Газар хөдлөлт болон бусад байгалийн гамшиг тохиолдсон үед битүү орон зайд нэвтэрч орох нь хүнд сорилт болдог. Энэ тохиолдолд электрон төхөөрөмж, микрофоноор тоноглогдсон жоомнуудын хөдөлгөөнийг ажиглаж занганд орсон хүмүүсийн байршлыг тогтоох боломжтой ажээ. Алсын удирдлагатай энэхүү төхөөрөмжийг гамшгийн үед хүний амь насыг аврах зорилгоор бүтээжээ. "Шавьжнууд жижиг орон зайд мөлхөх төрөлхийн чадвартай байдаг. Энэ чадварыг нь уламжлалт синтетик робот бүтээхэд ашиглаж болно" хэмээн "Био организмын судалгаа ба авран хайх ажиллагааны дуу авианы мэдрэгчүүд" нэртэй дээрх судалгааны бүтээлд дурдсан байна. Мэдрэмтгий микрофоныг жоомнуудын биед наалдуулсанаар аврах ажиллагаа үр дүнтэй явагдана гэж шинжлэх ухаан баталлаа. Учир нь жоомнууд ямар нэгэн юмыг дуу авиагаар нь олж таних төрөлхийн чадвартай байдаг.