21-ЭЭС ДООШ НАСНЫ ИРГЭНД АРХИ СОГТУУРУУЛАХ УНДАА ХУДАЛДВАЛ ҮЙЛ АЖИЛЛАГААГ НЬ ЗОГСООНО

2017 онд согтууруулах ундаа хэрэглэсэн үедээ 21-ээс доош насны 100 орчим иргэн гэмт хэрэгт холбогджээ. Үүнээс 25 нь амь насаа алдсан байна. Тиймээс тэдэн рүү чиглэсэн нэг сарын ажиллагааг холбогдох байгууллагууд өнөөдөр эхлүүлээд байна. Манай улсад архи, согтууруулах ундаагаар үйлчилдэг 12507 байгууллага байдаг аж. Аяны хүрээнд эдгээр байгууллагад хяналт, шалгалт хийх юм байна. Хэрэв 21-ээс доош насны иргэнд архи, согтууруулах ундаагаар үйлчилбэл тухайн байгууллагын үйл ажиллагааг зогсоох юм.

21-ээс доош насны иргэнд архи, согтууруулах ундаагаар үйлчлүүлж байгаа байгууллагын тухай мэдээллийг хүүхдийн тусламжийн утас 108 дугаарын утсанд ирүүлэхийг санууллаа. Дуудлага өгсөн иргэний мэдээллийг нууцална.