​ТӨРСНИЙ ДАРААХ СОЛИОРОЛ ГЭХ ЭМГЭГЭЭР 21 ЭХ ЭМЧЛҮҮЛЖЭЭ

Жирэмсэний болоод төрсний дараах сэтгэл гутрал гэж айхтар зүйл дөнгөж амаржсан ээжүүдэд мэдэгддэг гэдэг.

Сэтгэл гутралаасаа болж янз бүрийн үйлдэл хийхийг завддаг байна. Тухайлбал энэ сарын 01-нд эсэн мэнд амаржиж, эрүүл саруул хүүхэд төрүүлсэн эх ЭХЭМҮТ-ийн 3 давхраас үсэрч амиа алдсан харамсалтай хэрэг гарсан билээ. Талийгаачийг төрсний дараах сэтгэл гутралд автаж ийм үйлдэл гаргасан байх гэж мэргэжлийнхэн үзэж байгаа юм. Түүнээс зүгээс ямар нэгэн дарамт шахалт, асуудал байгаагүй гэдгийг ар гэрийнхэн нь хэлж байгаа юм.

Түүнээс гадна хоёр жилийн өмнө Баянхонгор аймагт нярай хүүхдээ зүүгээр шивж алахыг завдсан, мөн ихэр нярайгаа усанд живүүлж амийг нь егүүтгэхийг завдсан хэргүүд гарсан билээ. Тэдгээр эхчүүдийг мөн л төрсний дараах сэтгэл гутрал буюу даавартай холбож ярьж байсан юм.

Тэгвэл төрсний дараа сэтгэл гутралаас болж галзуурах, хоол унднаас гарах, нойргүйдэх зэрэг шинж тэмдэг шинэ ээжүүдэд их анзаарагдаж мэдрэгддэг юм байна. Тухайлбал, сүүлийн 5 жилийн хугацаанд төрсний дараах солиорол эмгэг гэсэн оноштойгоор СЭМҮТ-д 21 ээж эмчлүүлсэн байна. Харин энэ он гарсаар нярай хүүхдээ хөнөөсөн зургаа, нярайгаа хаясан гэх гурван хэрэг бүртгэгджээ.