УИХ-ын дарга М.Энхболдыг сайн дураараа огцорж, Ерөнхий сайд У.Хүрэлсүхийг шударга ёсыг тогтоох, хариуцлага тооцох ажлаа шуурхай хийхгүй бол УИХ-ыг тараах байр сууриндаа хутуу зогсох болно гэдгийг УИХ дахь АН-ын бүлгийг төлөөлж УИХ-ын гишүүн Б.Пүрэвдорж мэдэгдлээ.
Энэ талаар УИХ дахь АН-ын бүлгийн дарга Б.Пүрэвдорж хэлэхдээ хуулиар М.Энхболд даргыг огцруулах боломж байхгүй, харин ёс зүйн хувьд сайн дураараа огцрохыг шаардаж байна хэмээгээд "АН-ын бүлгийн зүгээс УИХ-ын дарга М.Энхболд, Ерөнхий сайд У.Хүрэлсүх нарт албан мэдэгдэл хүргүүлж байна. МАН-ын хуваагдал төрийн хуваагдал болж хувирч байна. Үүнтэй холбогдуулан М.Энхболд албан тушаалаа сайн дураараа өгч 60 тэрбумын гэх асуудалдаа шалгуулах ёстой. 2016 онд УИХ-ын дарга болсноосоо хойш төрийн албан тушаалыг тодорхой хэмжээгээр 60 тэрбумын схемээр оруулж зарж байна гэсэн шүүмжлэлийг АН-ын бүлэг хүчтэй тавьж ирсэн.
У.Хүрэлсүх Ерөнхий сайд стратегийн ордыг авсан, концесс авсан, ЖДҮ-ийн зээл авсан гишүүдэд хариуцлага тооцох асуудлыг маш шуурхай оруулж ирэх ёстой. Хариуцлагын тогтолцоог бий болгоно гэсэн үгэндээ хүрэхийг шаардаж байна. Энэ шаардлагаа маш хурдан биелүүлэх ажлаа хийхгүй бол парламент гацалтын байдалд орж, төрийн үйл ажиллагаа явагдахгүй хэвээр байх болно. Хэрэв энэ байдал удаан үргэлжлэх юм бол АН-ын бүлэг Ерөнхийлөгчөөс оруулж ирсэн УИХ-ыг тараах байр сууринд бат суурьтай байх болно гэдгийг мэдэгдье" гэсэн юм
Сэтгэгдэл (0)
Сэтгэгдэл бичигдээгүй байна