Копенгагены их сургууль, Калифорнийн Бэркли их сургуулийн хамтарсан судалгаагаар "Nike", "Facebook","Google" зэрэг үндэстэн дамнасан том корпорацууд Дани улсын нутаг дээр олсон орлогоо өөр улс дахь данс руугаа шилжүүлэх үед Дани нь эдгээр компаниудаас татвар болгож авах ёстой байсан 15 доллар тутмынхаа 12-ыг нь алдаж байгааг тогтоожээ.

Үүний улмаас зөвхөн 2016 онд гэхэд л Дани улс нь 1 тэрбум доллар авч чадалгүй алджээ. Европын бусад улсууд ч үүнтэй адил асуудалтай тулгараад байгаа тухай Данийн сонин хэвлэлүүд мэдээлж байна. Тус судалгааг явуулсан эрдэмтдийн нэг ЛюдвигВиер нь "Европын холбооны гишүүн Ирланд, Нидерланд, Люксембург зэрэг улсуудад Европын холбооноос татвар төлөлгүйгээр орлогоо гаргах боломж болгосон олон цоорхой бий тул Европын орнууд маш ихийг алдаж байгаа" гэж хэлснийг Данийн "Jyllands-Posten" сонин иш татсан байна.

Дани улсын Татвар, хураамжийн сайд МортенБёдскоу нь алдаж байгаа мөнгөний тоог сонсохоор уур нь хүрдэг гээд "Энд энгийн шийдэл гэж байхгүй. Европын холбооны бүх улс нэгдмэл шийдэлд хүрэх гарцаагүй шаардлагатай. Зөвхөн ингэж байж л бид Европын баялгийн санхүүжилтийг мэхлэлтээс хамгаалж чадна" гэж мэдэгджээ.

Сүүлийн үед Европын холбооны гишүүн орнууд "Facebook", "Google" гэх мэт Америкийн том компаниудыг татвараас зайлсхийсэн хэрэг буруутган, торгох, нэмэлт татвар ногдуулах нь нэмэгдсэн. Үүнд АНУ-ын Ерөнхийлөгч Трамп ихэд дургүйцэн хариу болгож Европын бараа, бүтээгдэхүүнд бүр өндөр татвар ногдуулж магадгүй талаар мэдэгдээд байгаа билээ.