Улаанбурхан өвчний тохиолдол 14 мянгыг давжээ

Баяр,наадам, амралт зугаалгын  энэ өдрүүдэд Халдварт өвчин судлалын үндэсний төв (ХӨСҮТ)-өөс олон нийтэд хандан эрүүл мэндийн зөвлөмж, сэрэмжлүүлгийг хүргэлээ. 

Энэ оны долдугаар сарын эхний байдлаар улсын хэмжээнд улаанбурха өвчний батлагдсан тохиолдол 14,129 хүрчээ. Батлагдсан тохиолдлын 70.8 хувь нь вакцинд хамрагдаагүй, 5.8 хувь нь вакцины насанд хүрээгүй, 8.5 хувь нь бүрэн бус тунитай, 15 хувь нь вакцинтай ч халдвар авсан байна.

Иймд 15 хүртэлх насны хүүхдүүдийг харьяалал харгалзахгүйгээр бүх өрхийн эмнэлэг, дүүрэг, сумдын эмнэлэгт үнэ төлбөргүй нөхөн дархлаажуулалтад хамруулж эхэлжээ. Эцэг эхчүүд та бүхнийг хүүхдээ ойролцоох эмнэлэгт аваачиж, вакцинд хамруулахыг уриалж байна.

Мөн зуны улиралтай зэрэгцэн гэдэсний халдварт өвчин нэмэгдэх хандлагатай байгаа тул баяр наадмын өдрүүдэд хоол хүнсний аюулгүй байдалдаа анхаарч, бага насны хүүхдүүдийг хэт халалтаас хамгаалахыг зөвлөж байна.

Нарших үед суулгах, толгой болон гэдэс өвдөх зэрэг шинж илэрдэг нь гэдэсний халдвартай андуурах тохиолдол ч гардаг аж. Энэ нь хүүхдийн эрүүл мэндэд ноцтой эрсдэл үүсгэх магадлалтай тул сэрэмжтэй байхыг мэргэжилтнүүд анхаарууллаа.