ТЕГ-ын Сөрөх тагнуулын газрын дарга асан Донровын Цогтбаатарыг Улсын ерөнхий прокурорын хэрэг эрхлэх газрын дарга томилжээ. Д.Цогтбаатарын тухайд өнгөрсөн хугацаанд багагүй дуулиан тарьж байсан хурандаа цолтой нэгэн юм. Тухайлбал, Д.Цогтбаатар нарыг кино найруулагч Г.Бадамрагчаад эрүү шүүлт тулган, онц хүнд гэмт хэрэг хүлээлгэхээр оролдсон гэж прокурорын байгууллагаас яллах дүгнэлт үйлдсэн юм. Харин Д.Цогтбаатарыг төрийн нууц задруулсан, бусдын эд хөрөнгийг авахаар далайлган сүрдүүлсэн гэм буруутай хэмээн үзэж, Эрүүгийн хуулийн тусгай ангийн 87.1-д зааснаар таван жил, 149.2-т зааснаар мөн хугацаагаар хорих ял оноосон. Үүнээс бусдын эд хөрөнгийг авахаар далайлган сүрдүүлсэн гэмт хэргийг нь 2009 онд батлагдсан Өршөөл үзүүлэх тухай хуульд хамруулан хэлтрүүлж, биечлэн эдлэх ялыг таван жил байхаар тогтоосон юм. Түүнийг ХБНГУ-ын иргэн Клойбер Максимлиан Леонардыг улсынхаа банкийг залилан их хэмжээний мөнгө аваад оргон Монголд орж ирэхэд нь сүрдүүлж эд хөрөнгийг нь авах гэмт хэрэг үйлдсэн гэж үзсэн. Түүнчлэн иргэн Н.Наранбаярыг худал мэдүүлэг өгсөн гэж үзэн нэг жил тэнсэн харгалзах ял оноосон. Эрүүгийн хэргийн давж заалдах шатны 10 дугаар шүүх уг хэргийг 2014 оны арванхоёрдугаар сарын 18-нд хянан хэлэлцээд анхан шатны шүүхийн шийдвэрийг хэвээр үлдээж байв. Найруулагч Г.Бадамрагчаа өөрт нь хилс хэрэг тулгаж эрүүдэн шүүсэн тухайд 2014 оны хоёрдугаар сард хэвлэлд өгсөн ярилцлагадаа "Цогтбаатар нь хэрэгт холбогдоод ТЕГ-аас халагдсан байна билээ. Би энэ ардчилсан нийгэмд нөгөө гучаад оны хэлмэгдүүлэлт яг хэвээрээ байгааг биеэр мэдэрч маш айсан. Энэ тухай яагаад ч дуугүй өнгөрч болохгүй гэж бодоод ярьж байна. Миний толгойд буу тулгаж байгаад байцаадаг байсан" гэж ярьж байв. Ярилцлагыг бүрэн эхээр нь https://t.co/yVmzEY2L6S уншина уу.