Өнгөрсөн тавдугаар сарын 17-ний өдрийн 19.00 цагийн орчимд УИХ-ын гишүүн асан Г.Батхүү Төрийн ордонд учир битүүлгээр амь насаа алдсан. Талийгаачийг Төрийн ордны хоёр давхрын гонхноос доош унаж амиа алдсан байхад нь Төрийн ордны үйлчилгээний ажилтан анх харсан байдаг. Талийгаач тэр өдөр "Торгоны зам" олон улсын авто раллиг зохион байгуулах ажлын хэсгийн хуралд 15:00-18:00 цагийн хооронд оролцсон байдаг.
Учир битүүлэг энэ хэргийг нийслэлийн Цагдаагийн газрын Онц хүнд гэмт хэрэгтэй тэмцэх хэлтсийн даргаар ахлуулсан Ажлын хэсэг мөрдөн шалгасан бөгөөд эх сурвалжийн мэдээллээр мөрдөн шалгах ажиллагаа дууссан байна.
Хэргийг шалгаж эхлэх үед талийгаачийн ар гэрийнхний зүгээс нэр бүхий УИХ-ын гишүүн, тэдний туслахуудад Polygraph шинжилгээ хийлгэх хүсэлт гаргасан гэх мэдээлэл бий. Энэ нь "худал мэдүүлэгч" шинжилгээ бөгөөд тухайн шинжилгээг өгөгч иргэн худал мэдээлэл өгсөн тохиолдолд "худал мэдээлэл" гэх анхааруулгыг өгөх шинжилгээ юм. Энэ төрлийн шинжилгээ нь хавтаст хэрэгт нотлох баримт болохгүй гэж салбарын сайд нь мэдэгдсэн байдаг юм.
Г.Батхүү агсныг амиа алддаг өдөр төрийн ордонд УИХ-ын гишүүдийн дунд архидалт болсон. Тухайн үед архи уусан болоод төрийн ордонд байсан 200 орчим иргэнээс цагдаагийн байгууллага гэрчийн мэдүүлэг авчээ. Төрийн ордонд архи уусан гишүүд нэг нэгийгээ нэрлэж байсан. Энэ талаар УИХ-ын гишүүдээс мэдээлэл авч байсныг энд сануулъя.Г.Батхүү агсны ар гэрийнхэн түүний үхлийг золгүй явдал байсан гэдэгтэй санал нийлэхгүй байгаа бөгөөд ОУ-ын парламентын холбоонд ч уг асуудлаар хандсан билээ.
Сэтгэгдэл (0)
Сэтгэгдэл бичигдээгүй байна