Астуриас мужийн хөл бөмбөгийн дасгалжуулагч, техникч нар Дархан хотын тамирчидтай хамтарч ажиллана

2019 оны 10 дугаар сарын 21-25-ны өдрүүдэд аймгийн Засаг дарга С.Насанбат Испанийн Вант улсын Астуриас мужид ажлын айлчлал хийсэн. Улмаар 2019 оны 12 дугаар сарын 11-ны өдөр Испанийн Вант улсын Астуриас мужийн итгэмжлэгдсэн төлөөлөгч Мануэл Гонзалэз Гарсиа Дархан-Уул аймагт айлчилснаар манай аймаг, Испанийн Вант улсын Астуриас мужтай ах дүүгийн хамтын ажиллагаатай хотууд болсон билээ.

Айлчлалын хүрээнд яригдсан зүйлүүд эхнээсээ бодит ажил болж Дархан-Уул аймагт хөл бөмбөгийн спортыг дэлхийн жишигт ойртуулж хөгжүүлэхэд Испанийн Вант улсын Астуриас мужаас хөл бөмбөгийн мэргэжлийн дасгалжуулагч, техникч урьж ажиллуулахаар болсон юм.

Тэд дэлхий нийтэд үүсээд буй коронавирусийн нөхцөл байдал намжихаар манай аймагт ирж ажиллах тухайгаа албан бичгээр ирүүлсэн байна.

Өнөөдрийн байдлаар улсын төсвийн хөрөнгө оруулалтаар барьж буй хөл бөмбөгийн талбайн ажил 70 хувийн гүйцэтгэлтэй байна. Тус талбайг ирэх 10 дугаар сар гэхэд бүрэн ашиглалтад оруулахаар ажиллаж байна.