Бельгийн Төсвийн асуудал хариуцсан төрийн нарийн бичгийн дарга Ева де Бликер “Твиттер” дээр Европын холбооны гишүүн орнуудаас захиалга өгөөд байгаа үндсэн зургаан вакцины үнэ бүхий хүснэгтийг андуурч хэвлээд, зөвхөн ЗГ мэдэж байсан нууц мэдээллийг ил болгож орхижээ. Хэдхэн минутын дараа Де Бликералдаагаа ойлгон жиргээгээ янзалсан ч сэтгүүлчид скриншот хийж, мэдээллийн хэрэгслүүдээр тараасан нь олон нийтийн анхаарлыг ихээр татаад байна.
Энэхүү хүснэгтэд өгүүлснээр “AstraZeneca” вакцины 1 тун €1,78, цаашлаад Johnson & Johnson - $8,5 (€7), Sanofi - GSK - €7,56 , CureVac - €10, BioNTech - Pfizer - €12, Moderna - $18 (€14,6) тус тус байжээ.
Европын холбооны гишүүн орнууд нь энэ заагдсан үнээр вакцин худалдаж аваад цаашдаа өөрийн онцлогч тохируулан үнийг бие даан тогтоож байгаа юм байна. Гэвч одоохондоо эдгээр вакцинаас Европын холбооны зах зээлд ашиглах зөвшөөрөл авсан нь нэг ч үгүй. Дараагийн долоо хоногт “Pfizer”-ийн вакцин зөвшөөрөл авах бөгөөд ерөнхийдөө Европт энэ сарын 27-29-нд вакцинжуулалт эхлэх аж.
Европын холбооны удирдлага нь вакцин худалдан авсан үнийг хэсэг хугацаанд нууцалж байгаад 2021 оны Европпарламентын гишүүдийн хаалттай хуралдаанаар л дуулгах төлөвлөгөөтэй байсан нь одоо талаар болж байгаа бололтой.
Түүнчлэн хэргийн эзэн Де Бликерийн мэдээлснээр Бельги нь 33,5 сая тун вакцин худалдан авахад 279 сая евро төлөхөд бэлэн байгаа юм байна. Вакцинжуулахад дараалан хоёр тунг хэрэглэх шаардлагатай байдаг тул энэ тооны вакцинаар 16 сая хүнийг вакцинжуулахад хангалттай. Илүү гарсныг нь Бельги онцгой тохиолдолд хэрэглэхээр нөөцлөөд, цаашдаа шаардлагатай гэж үзвэл гуравдагч улсуудад дамжуулан өгч магадгүй.