Дэлхийн нийтэд юу болж байгаагаас үл хамаараад өөрийн гэсэн бяцхан, “бичил хүлэмж”-ийн орчинд амьдардаг цөөн хэдэн улсын нэг нь Туркменистан. Энэ улсын талаар Ерөнхийлөгч Бердымухамедов нь дугуй унан мэргэн буудсан гэх мэт ер бусын үйлдэл хийсэн эсвэл өргөн хэрэглээний зарим нэр төлийн хүнсний бүтээгдэхүүний хомсдол үүсэж, иргэд нь зодолдсон тухай мэдээ л хааяа нэг дуулддаг. Энэ удаад ч мөн л Ерөнхийлөгч Бердымухамедов ер бусын үйлдэл хийсэн тухай hronikatm.com сайт мэдээлжээ.
Цар тахал гээд дэлхий даяар хямарч, бүгд л хэмнэж гамнах гэж байгаа бол Туркмен улсад үүнээс тусдаа гэдгээ харуулсан. Тэнд тусгаар тогтнолынхоо 30 жилийн ойг тохиолдуулан Ерөнхийлөгчийнхөө нэрэмжит зочид буудал, алабай үүлдрийн нохой үржүүлгийн газар, ёслолын жагсаал хүлээн авах индэр барихад 1,37 тэрбум доллар зарцуулах гэж байгааг тус сайтын сэтгүүлчид олж мэдсэн байна. Туркмений зурагтаар Ерөнхийлөгч оролцсон зөвлөгөөний тухай нэвтрүүлэг гаргахдаа баригдах объектуудын нэр, гүйцэтгэгч ба зарцуулах мөнгөн дүнг бичсэн зургийг санамсаргүй авсан байж. Энэ хэсгийг сэтгүүлчид анхааралтай үзээд ямар объект, ямар үнээр баригдах гэж байгааг олж мэдсэн байна.
Ингэтэл Францын “Bouygues Bâtiment” компанийн хөлслөн 1,37 тэрбум доллароор хэд хэдэн барилга бариулах гэж байгаа болж таарчээ. Тухайлбал, Ашхабад хотод баярын жагсаал хүлээн авах индэр, Олон улсын хүлээн авалтын төв, “Туркменбаши” банкны барилга, “Аркадаг” зочид буудал. Эндээс “Аракадаг” гээд байгаа зочид буудлыг барихад 448 сая доллар төсөвлөсөн байна. “Аркадаг” гэдэг нь “Тэтгэгч” гэсэн утгатай бөгөөд Бердымухамедовын албан ёсны нэг цол юм.
Францын компаниар ийм чухал барилга бариулах бол өөрсдийн “Myradym” компаниар Туркмений үндэсний баялгийг нэг гэж тунхаглагдсан алабай үүлдрийн нохойны үржүүлгийн газар барих даалгавар авсан байна.
Сэтгэгдэл (0)
Сэтгэгдэл бичигдээгүй байна