Хятадын эдийн засгийг цар тахлын дараа аль болох богино хугацаанд нөхөн сэргээхэд ачаа барааг Ази тив, Оросын төмөр замаар Европ хүргэх нь илүү ашигтай болж хувирсан тухай “Financial Times” мэдээлсэн байна. Манай төмөр замын ачаалал ч маш ихээр нэмэгдэх бололтой. Хуучин бол Хятадын барааг далайн тээврээр Европ хүргэх нь илүү хурдан бас ашигтай гэсэн үзэл Хятадад давамгайлж байсан.
Харин сүүлийн төмөр замын тээврийг дээр гэж сонгох болсон байна. Жишээлбэл, 2021 оны эхний хоёр сарын дотор Хятадаас Европ руу даруй 2000 гаруй ачааны галт тэрэгний цуваа явсан нь 2020 оныхоо даруй хоёр дахин их тоо болсон гэж байна. Ерөнхийдөө 2020 онд төмөр замаар тээвэрлэж байгаа ачааны тоо 2019 оныхоо даруй 50 хувиар өсөөд байгаа аж.
Өнгөрсөн оны дундаас эхлээд далайн тээврийн үнэ болон хүргэлтийн хугацаа хоёр дахин өссөн нь ийнхүү төмөр замыг тээврийг сонгоход хүргэсэн тухай мэргэжилтнүүд ярьжээ. Тодруулбал, электрон бараа, фитнес тоног төхөөрөмж, корона вирусийн эсрэг бүтээгдэхүүн нь эрэлт асар өндөр байгаагийн дээр агаарын тээвэрт тохиромжгүй тул цаашид ч төмөр замын тээврийн хэмжээ буурахгүй гэж мэргэжилтнүүд үзсэн байна. Одоогийн байдлаар дээр нэр дурдсан бүтээгдэхүүн үйлдвэрлэгчдийн 30 хувь хүртэлх нь далайн тээврээс татгалзаж, төмөр замыг сонгожээ.
Төмөр замын тээврийн цаашдаа нэлээд хугацаанд өндөр ачаалалтай болгох бас нэг шалтгаан нь Суэцийн сувагт гаран осол болсон байна. Аварга том онгоц Суэцийнсувгийг бүхэлд нь хааж, Хятадаас Европыг зорьсон далайн тээвэр үндсэндээ зогсоод байгаа аж. Суэцийнсувгаар дэлхийн худалдааны 14 хувийг тээвэрлэн зөөдөг тул даатгалын компаниуд асар их хохирол амсаж байгаа юм байна. “Lloyd’s List” компанийн тооцсоноор Суэцийнсувгийг хаасан цагаас хойш дэлхийн эдийн засаг цаг тутам 400 сая долларын алдагдал хүлээж байгаа аж.
Сүүлд ирсэн мэдээгээр Суэцийн сувгийн гацааг арилгахад нэлээд хэдэн долоо хоног шаардагдаж магадгүй гэсэн. Иймд Европ руу бараа нийлүүлэгч Хятадын зарим компани ОХУ-д хандан Европ орох төмөр замын тээвэр хүргэлт зохион байгуулахад дэмжлэг үзүүлэхийг хүсжээ.
25°C
Сэтгэгдэл (134)