Төв аймаг: Самар түүхээр явсан хоёр иргэн осолдож амиа алджээ

Төв аймгийн Мөнгөнморьт суманд ослын улмаас харамсалтайгаар хоёр иргэн амиа алджээ.

Тодруулбал, Төв аймгийн Мөнгөнморьт сумын Жаргалант багт самар түүхээр Мөнгөнморьт сумын чиглэлд зорчиж байсан нийслэлийн Багануур дүүргийн харьяат гурван иргэн автомашинтайгаа “Зүүн бүрх” гол руу унасан гэх дуудлага есдүгээр сарын 28-ны 20:13 цагт иржээ.

Аймгийн Онцгой байдлын газрын Мөнгөнморьт сум дахь Гал түймэр унтраах, аврах 75 дугаар анги, Цагдаагийн хэсгийн алба хаагчид 5 км замыг туулан 20:23 цагт очиход “Газ 2410” загварын суудлын автомашин “Зүүн бүрх”-ийн гол руу унаж, жолооч З /37 настай, эрэгтэй, согтуу/ автомашинаасаа голын эрэг дээр эсэн мэнд өөрөө гарсан байсан бөгөөд зорчигч иргэн Э /52 настай, эрэгтэй, согтуу/, иргэн Б /44 настай, эрэгтэй, согтуу/ нарын цогцсыг 21:13 цагт гаргаж, Мөнгөнморьт сум дахь Цагдаагийн хэсэгт шилжүүлэн өгсөн талаар ОБЕГ-аас мэдээллээ.