Иргэд НӨАТ-ын хуулийн дагуу НӨАТ суутган төлөгч иргэн, ААН-тэй хийсэн худалдан авалтад төлсөн албан татварын 20 хүртэл хувийг буцаан авах мөн сар бүр төлбөрийн баримтаа Цахим төлбөрийн баримтын системд бүртгүүлэн сугалаанд оролцон урамшуулалд хамрагдаж байна.
Өнөөдөр Сангийн яамны харьяа Гааль, Татвар, Санхүүгийн мэдээллийн технологийн төвийн байранд НӨАТ-ын 27 дахь удаагийн тохирлоор азтан болсон иргэдийн төлөөлөлд ТЕГ-ын Татварын орлогын газрын дарга Д.Цогтжаргал, Татвар төлөгчтэй харилцах газрын дарга Д.Цогзолмаа, ГТСМТТ-ийн захирал Ц.Орхонтамир нар батламжыг гардуулан өглөө.
Татварын нэгдсэн системд 2016 оны 1 дүгээр сараас эхлэн нийт 83,356 ААН холбогдон, иргэдэд сугалааны дугаар, QR код бүхий 398,274,282 ширхэг төлбөрийн баримтыг олгосон байна. Мөн ebarimt.mn цахим системийг 883,001 хэрэглэгч ашиглаж 211,826,112 ширхэг төлбөрийн баримтыг баталгаажуулжээ.
2016 онд 497,465 иргэнд 35.1 тэрбум төгрөгийн буцаан олголтыг урамшуулал хэлбэрээр олгосон ба 2017 онд 10 дугаар сарын 12-ны өдрийн байдлаар 48,9 тэрбум төгрөгийг 615,310 иргэнд олгохоор байна.
НӨАТ-ын урамшууллын системийн И баримт сугалааны тохиролд татвар төлөгч иргэд цахим төлбөрийн баримтын системд 2016 оноос хойш, 2017 оны эхний 10 сарын байдлаар нийт 27 удаагийн сугалааны тохирол зохион байгуулагдсан ба 178,107 иргэнд 6,9 тэрбум төгрөгийн сугалааны урамшуулал олгосон бөгөөд үүнээс 2017 онд 91,954 иргэнд 3,4 тэрбум төгрөг олгожээ.
Сэтгэгдэл (0)
Сэтгэгдэл бичигдээгүй байна