ХЭРЛЭН ГОЛД ЖИВСЭН 13 НАСТАЙ ХҮҮГ ЭРЭН ХАЙЖ БАЙНА

Онцгой байдлын газарт усны ослын тухай дуудлага тасрахгүй ирсээр байгаа ажээ. Тухайлбал, энэ сарын 15-ны өдрийн 18:20 цагт Дорнод аймгийн Хэрлэн (Сүмбэр) сумын 8 дугаар багийн "Далан" гэдэг газар (сумын төвөөс урд зүгт 1 км-т) "Хэрлэн" голд тус багийн харьяат Д (13 настай, эрэгтэй) ороод живсэн тухай дуудлага хүлээн авчээ. Тус дуудлагын дагуу Дорнод аймгийн Онцгой байдлын газрын 11 алба хаагч, 2 техник хэрэгсэлтэйгээр 1 км зам туулан 18:33 цагт ослын газарт очиж, эрэн хайх ажиллагаа зохион байгуулж буй юм байна.

Мөн өдрийн 17:33 цагт Өмнөговь аймгийн Цогтцэций сум (Тавантолгой)-ын Цагаан-Овоо багийн "Ханангийн-Антен" гэдэг газар (сумын төвөөс баруун хойд зүгт 55 км-т) Ханбогд сумын Хайрхан багийн "Цагаан хад" гэдэг газраас Улаанбаатар хотын чиглэлд зорчиж явсан иргэн Х-гийн эзэмшлийн "Старикс" загварын суудлын автомашин шаварт суусан тухай дуудлага иржээ. Энэхүү дуудлагын дагуу тус сум дахь Гал түймэр унтраах, аврах 44 дүгээр ангийн 6 алба хаагч, 1 техник хэрэгсэлтэйгээр 55 км зам туулан, 20:38 цагт очиж, 50 минут ажиллаж татан гаргасан байна.

Энэ сарын 14-ний өдрийн 15:30 цагт Архангай аймгийн Өгийнуур сумын Өгий багийн "Баяртын-Овоо" гэдэг газар (сумын төвөөс зүүн зүгт 20 км-т) Өгий нууранд Нийслэлийн Сонгинохайрхан дүүргийн харьяат, иргэн П (43 настай, эрэгтэй) живсэн тухай дуудлага иржээ.

Тус дуудлагын дагуу Архангай аймгийн Онцгой байдлын газрын 11 алба хаагч, Үндэсний аврах бригадын 8 алба хаагч, нийт 19 алба хаагч, 3 техник хэрэгсэлтэйгээр эрэн хайх ажиллагаа зохион байгуулсан байна. Эрлийн баг наймдугаар сарын 15-ны өдрийн 09:40 цагт иргэн П-гийн цогцсыг нуурын эргээс 12 метрийн зайнаас, 3 метрийн гүнээс олж, цагдаагийн байгууллагад хүлээлгэн өгчээ