Монголд айлчлах Туркменистаны Ерөнхийлөгч Сердар Бердымухамедов гэж хэн бэ?

Ерөнхийлөгчийн урилгаар Туркменистан Улсын Ерөнхийлөгч Сердар Бердымухамедов 2025 оны 06 дугаар сарын 01-02-ны өдрүүдэд Монгол Улсад төрийн айлчлал хийх гэж байна.

Монгол Улс Туркменистан Улстай дипломат харилцаа тогтоогоод 33 жил болж байгаа бол Ерөнхийлөгч У.Хүрэлсүх өнгөрсөн жил Монгол Улсаас анх удаа Туркменистан Улсад төрийн айлчлал хийсэн билээ. Тэгвэл энэ удаагийн Туркменистаны Ерөнхийлөгчийн хариу айлчлал ч анхных юм.

Энэ жил 44 настай, “залуу” Ерөнхийлөгч Сердар Бердымухамедов нь Туркменистаны Хөдөө аж ахуйн их сургуульд инженерээр, ОХУ-д олон улсын харилцааны чиглэлээр, Женев дэх Аюулгүй байдлын бодлогын төвд Европын болон олон улсын аюулгүй байдлын чиглэлээр суралцаж мэргэшсэн, техникийн шинжлэх ухааны докторын зэрэгтэй. Туркмен, орос, англи хэлтэй.

Түүний намтраас:

2001 онд Туркменистан Улсын Хүнсний аж үйлдвэрийн холбооны Гадаад эдийн засгийн харилцааны хэлтсийн ахлах мэргэжилтэн

2001 - 2003 онд Цэргийн алба хаасан

2003 - 2008 онд Туркменистан Улсын Хүнсний аж үйлдвэрийн холбооны Жимс, хүнсний ногооны үйлдвэрийн ерөнхий газрын ахлах мэргэжилтэн

2008 - 2011 онд Туркменистан Улсаас ОХУ-д суугаа ЭСЯ-нд зөвлөх

2011 - 2013 онд Туркменистан Улсаас НҮБ-ын Женев дэх төв болон олон улсын
бусад байгууллагын дэргэд суугаа БТГ-ын зөвлөх

2013 онд Туркменистаны ГХЯ-ны Европын орнуудын хэлтсийн дарга

2013 - 2016 онд Нүүрс, устөрөгчийн нөөцийн удирдлага, ашиглалтын асуудал эрхэлсэн агентлагийн дэд дарга

2016 - 2017 онд Туркменистаны ГХЯ-ны Олон улсын мэдээллийн хэлтсийн дарга

2016 - 2018 онд Туркменистаны Парламент Межлисын депутат

2018 – 2019 онд Туркменистаны Гадаад хэргийн дэд сайд

2019 - 2020 онд Ахал велаят мужийн хяким (Мужийн захирагч)

2020 -2021 онд Аж үйлдвэр, барилгын үйлдвэрлэлийн сайд

2021 оны 02 сар Сайд нарын танхимын дэд дарга

2021 оны 07 сар Сайд нарын танхимын эдийн засаг, банк, олон улсын санхүүгийн байгууллагын асуудал эрхэлсэн дэд дарга

2022 оны 3 дугаар сарын 19-ний өдрөөс Туркменистан Улсын Ерөнхийлөгчийн
албыг хашиж байна. Тэрбээр Ерөнхийлөгч болсноос хойш:

• 2022 онд Орос, Иран, Узбекистан, Казахстан, Арабын Нэгдсэн Эмират зэрэг таван улсад төрийн айлчлал,
• 2023 онд БНХАУ, Катар, Тажикистан, Турк зэрэг дөрвөн улсад төрийн айлчлал хийжээ.
• 2024 болон 2025 онд олон улсын хурал, чуулга уулзалтад оролцож, ажлын болон албан ёсны айлчлал хэрэгжүүлсэн байна.

Ийнхүү 2023 онд Турк Улсад хийсэн төрийн айлчлалаас хойш Монгол Улсад 10 дахь удаагийн төрийн айлчлалаа хийх гэж байна.