Шүдний эмч Б.Батбаяр 857 хүүхдийн шүд эмчилж бэлэг барилаа

Шүдний эмч Б.Батбаяр баг бүрэлдэхүүний хамт Булган аймгийн Баяннуур, Бүрэгхангай суманд амны хөндийн үзлэг, эмчилгээ хийж нийт 857 хүүхдийн шүдийг эрүүлжүүллээ. Баяннуур сумын 3-17 насны нийт 409 хүүхдэд амны хөндийн үзлэг эмчилгээ хийгдсэн бөгөөд цэцэрлэгийг 126, сургуулийн 283 хүүхэд хамрагдсан байна. Мөн эмнэлгийн 10 ажилтныг үзлэг, эмчилгээнд хамруулжээ. Мөн Бүрэгхангай суманд 3-17 насны нийт 438 хүүхдэд амны хөндийн үзлэг эмчилгээ хийгдсэнээс цэцэрлэгийн 69, сургуулийн 369 хүүхэд хамрагдсан байна. Шүдний ломбо, цоорол зогсоох түрхлэг, шүд авалт, цоорлоос хамгаалах сийлант, эрдэсжүүлэх түрхлэг болон бусад шаардлагатай үйлчилгээг хийж үйлчилжээ.

Мөн үзлэг эмчилгээнд хамрагдсан хүүхэд, гэр бүлийн хүмүүс, асран хамгаалагч нарт урьдчилан сэргийлэх шүд угаах арга, цоорол болон амны хөндийн гажиг үүсхээс урьдчилан сэргийлэх зөвлөгөө өгч, шүдний сойз сонголт, тухайн хүнд тохирсон угаах арга техникийг зөвлөн чиглүүлжээ. 

Шүдний эмч Б.Батбаяр Засгийн газрын тогтоол “Эрүүл шүд” арга хэмжээг хэрэгжүүлэх хүрээнд “Ц.Бадрал” сангаараа дамжуулан амны хөндийн үзлэг, эмчилгээг тасралтгүй 10 гаруй жил үнэ төлбөргүй хийж ажиллаж байна.