“НАМРЫН НОГООН ӨДРҮҮД” АРГА ХЭМЖЭЭНИЙ НЭЭЛТ БОЛНО

Хүн амын хүнсний хангамжийг тогтворжуулах, үндэсний үйлдвэрлэгчдийн шилдэг бүтээгдэхүүн, эх орны хөрсөнд ургасан шинэ ургацын дээжийг хэрэглэгчдэд шууд нийлүүлэх нөхцөлийг бүрдүүлэх зорилготой уламжлалт "Намрын ногоон өдрүүд" нэгдсэн арга хэмжээг "Эрүүл хүнс-Эрүүл Монгол хүн" уриан дор есдүгээр сарын 18-24-ний өдрүүдэд "Мишээл экспо" төвд зохион байгуулж байна. Үзэсгэлэнгийн албан ёсны нээлт өнөөдрийн 12.30 цагт болно.

2006 оноос эхлэн жил бүр уламжлал болгон зохион байгуулж, энэ жил 13 дахь намартайгаа золгож байгаа "Намрын ногоон өдрүүд" нь манай хүнс, хөдөө аж ахуйн салбарын хамгийн том үзэсгэлэн худалдаа болоод байна. Тус арга хэмжээнд нийслэл, 21 аймгаас шилдэг бүтээгдэхүүн үйлдвэрлэгчид, тариаланчид, ногоочид оролцож байгаа нь тус арга хэмжээний цар хүрээг илтгэж байна.Энэ жилийн хувьд, "Эрүүл хүнс" үзэсгэлэнд дотоодын хүнс үйлдвэрлэгч 180 гаруй иргэн, хоршоо, аж ахуйн нэгж "Алтан намар" үзэсгэлэн худалдаанд төмс, хүнсний ногоо, жимс, жимсгэнэ тариалагч 250 гаруй хоршоо, иргэн, аж ахуйн нэгж оролцож байна.

Өдөрлөгүүдийн үеэр дараах арга хэмжээг зохион байгуулна. Үүнд:

Хүнсний бүтээгдэхүүний зөв сонголт, хэрэглээ;
Амталгаат худалдаа, шинэ бүтээгдэхүүний танилцуулга;
Баяжуулсан хүнсний тухай хуулийн сурталчилгаа, хэлэлцүүлэг;
"Хүнсний ногоо" хөтөлбөрийн хүрээнд шинэ сортын ногоогоор хоол хийх үзүүлбэр, амталгаат худалдаа;
"Жимс жимсгэнэ" хөтөлбөрийн хүрээнд "Хүнсний ногоо, жимс бидний амьдралд" сэдэвчилсэн урлагийн тоглолт;
Орон нутгийн онцлогийг харуулсан үндэсний уламжлалт хоол, идээ ундааны танилцуулга;
Үзэсгэлэнд оролцогч болон сонирхогчдын дунд хөгжөөнт уралдаан тэмцээн, флаш моб;
"Та сүүгээ уусан уу" хэлэлцүүлэг;
"Алсыг хар – органикийг сонго" хэлэлцүүлэг;
"Махны салбарын эрх зүйн орчин" хэлэлцүүлэг;
"Хүүхдэд зориулсан бүтээгдэхүүний зах зээлийн онцлог, экспортын боломж" хэлэлцүүлэг;
Хүүхдэд зориулсан хүнсний бүтээгдэхүүний сурталчилгаа, амталгаат худалдаа;
Үзэсгэлэнд оролцогч болон сонирхогч хүүхэд багачуудын дунд хөгжөөнт уралдаан тэмцээн болно.