АНХААР: ОРОН НУТГИЙН ЗАМУУДАД ХАЛТИРГАА, ГУЛГАА ҮҮСЧЭЭ

Архангай аймгийн хэмжээнд их хэмжээний цас орж замын зорчих хэсэгт халтиргаа гулгаа үүсчээ. Иймд өөрийн болон бусдын аюулгүй байдлыг хангаж замын хөдөлгөөндөө оролцoхыг зөвлөж байна.

Мөн Улсын чанартай А27 дугаартай Лүн - Дашинчилэн - Батцэнгэл чиглэлийн автозамд их хэмжээний цас орсон, А0902 Булган - Мөрөн чиглэлийн автозамд явган цас шуурч, А1002 Эрдэнэт - Булган чиглэлд тэнгэр бүрхэг цас орж байгаа тул орон нутагт зорчих жолооч нар анхаарал болгоомжтой замын хөдөлгөөнд оролцохыг зөвлөж байна.

Өнөөдөр зүүн аймгуудын нутгийн зүүн хэсгээр цас орж, цасан шуурга шуурч, говь талын нутгаар хүчтэй салхитай байхыг онцгойлон анхааруулж байна.

2018 оны 10 дугаар сарын 23-наас 10 дугаар сарын 27-ныг хүртэлх цаг агаарын урьдчилсан төлөв: 23-нд баруун аймгуудын нутгийн баруун хэсгээр, 24-нд баруун болон төвийн аймгуудын нутгаар, 25-нд нутгийн зүүн хагаст, 26-нд зүүн аймгуудын нутгийн зүүн хэсгээр цас орж, салхи түр зуур секундэд 18-20 метр хүртэл ширүүсч цасан болон шороон шуурга шуурна. 24-нд нутгийн баруун хагаст, 25-нд ихэнх нутгаар хүйтэрч Дархадын хотгор, Алтай, Хангай, Хөвсгөл, Хэнтийн уулархаг нутаг, Хүрэн бэлчир, Завхан голын эх, Идэр, Тэс, Туул, Тэрэлж голын хөндийгөөр шөнөдөө 13-18 хэм, өдөртөө 1-6 хэм, говийн бүс нутгийн өмнөд хэсгээр шөнөдөө 0-5 хэм хүйтэн, өдөртөө 5-10 хэм дулаан, бусад нутгаар шөнөдөө 5-10 хэм хүйтэн, өдөртөө 1-6 хэм дулаан байна. Бусад хугацаанд өдөртөө бага зэрэг дулаарна.