АЖИЛТНУУДЫНХАА ЭРҮҮЛ МЭНДИЙН ДЭВТРИЙГ ХУУРАМЧААР БӨГЛҮҮЛСЭН БАЙЖЭЭ

Мэргэжлийн хяналтын ерөнхий газраас хүнсний үйлдвэрлэл, худалдаа, үйлчилгээ, цэцэрлэг, сургуульд ажиллагсдын Эрүүл мэндийн урьдчилан сэргийлэх үзлэг, шинжилгээний дэвтрийг шалгалт хийсэн байна. Шалгалтаар зарим байгууллагынхан эмч, эмнэлгийн тамга, тэмдгийг хуурамчаар үйлдсэн байжээ. Үүнээс гадна зөвшөөрөл бүхий эмнэлгүүд хүртэл үзлэг, шинжилгээ хийхгүйгээр дэвтэрт "Үзсэн" гэж бичиж өгснийг тогтоосон аж.

"Өвчтэйгөө мэдээгүй иргэн дэвтрээ хуурамчаар бөглүүлснээр ажлын орчиндоо халдвар тараах эрсдэлтэй. Ялангуяа худалдаа, үйлчилгээний газарт ажилладаг бол олон хүнийг хохироох магадлалтай" гэж Мэргэжлийн хяналтын ерөнхий газрынхан анхааруулав.

Тухайлбал, "Монос" эмийн үйлдвэр, Орхон аймгийн "Эмпати" сургууль болон Багануур дүүргийн "Наран" ресторанд хордлого гарсан нь халдварын голомтод нян тээгч ажиллаж байсантай холбоотой гэжээ.