МАН-ын Хяналтын хорооноос УИХ-ын гишүүн Ш.Раднаасэд, Д.Дамба-Очир нарт хариуцлага тооцож, намаас 5 жилийн хугацаанд улстөрийн дэмжлэг үзүүлэхгүй байх шийдвэр гаргасан. Тодруулбал, 2020 оны УИХ-ын сонгуульд нэр дэвших эрхгүй болгосон шийдвэр гаргасан.
Учир нь уг шийдвэртэй холбогдуулан "Энэ нам коммунист нам боллоо. Нэртэйгээр нь намаасаа хөөчих" хэмээн УИХ-ын гишүүн Д.Дамба-Очир байр сууриа илэрхийлж, "УИХ-ын гишүүн үг хэлж, байр сууриа илэрхийлсэнийхээ төлөө намаас хариуцлага тооцдог байж болохгүй. Нэг үгээр хэлбэл, нам УИХ-ын үйл ажиллагаанд оролцож байгаа нь буруу алхам" хэмээн намын бүлгийн гишүүд тэр чигээрээ шахуу Хяналтын хорооны шийдвэрийг эсэргүүцсэн юм.
Тиймээс өнгөрсөн баасан гаригт МАН-ын бүлэг оройн 17.00 цагийн үед хуралдаж, уг асуудлыг авч хэлэлцсэн. Ингэхдээ бүлгийн хуралд намын даргыг байлцуулж, Хяналтын хорооны шийдвэрийг Удирдах зөвлөлөөр яаралтай авч хэлэлцэнэ үү хэмээн албан ёсоор хүсэлтээ хүргүүлсэн байдаг. Намын дүрмийн дагуу энэ асуудлыг МАН-ын Удирдах зөвлөл хуралдаж шийдэх ёстой. Тодруулбал, Удирдах зөвлөл хуралдаад Хяналтын хорооны шийдвэрийг хэвээр үлдээх үү, хүчингүй болгох уу гэдгийг шийддэг аж.
Харин бүлгийн хурлын дараа МАН-ын Удирдах зөвлөл УИХ-ын гишүүн Ш.Раднаасэд, Д.Дамба-Очир нарын асуудлыг хэлэлцэж, Удирдах зөвлөлийн ихэнх гишүүд Хяналтын хорооны шийдвэрийг буруутгасан өнгө аяс илэрхийлсэнээр МАН-ын Хяналтын хорооноос гаргасан шийдвэрийг хүчингүй болгохоор болсон тухай эх сурвалж мэдээлж байна.
Сэтгэгдэл (0)
Сэтгэгдэл бичигдээгүй байна