Британийн парламентын цөөнх Лейборист намынхан 90-ээд онд ОХУ-д ажиллаж байсан Доминик Каммингсыг ямар арга замаар Ерөнхий сайд Борис Жонсоны ерөнхий зөвлөх болсныг ихэд сонирхох болсон талаар "The Sunday Times" сонин мэдээлжээ. Тодруулбал, Лейборист намын "сүүдрийн" Засгийн газрын "сүүдрийн" Гадаад хэргийн сайд ЭмилиТорнберри нь Засгийн газрын Гадаад хэргийн сайд Доминик Раабд хандан Каммингс нь ерөнхий зөвлөх болсноор нууцын ямар зэрэглэлтэй мэдээлэлтэй танилцах эрхтэй болсныг тодруулж өгөхийг хүсжээ. Мөн захидлын хуулбарыг Ерөнхий сайдын Үндэсний аюулгүй байдлын зөвлөх, сөрөг тагнуулын алба МI-5, гадаад тагнуулын алба МI-6 руу явуулсан аж. Захидалд Орост ажиллаж байсан хүн Их Британийн Засгийн газрын бодлогод нөлөөлөх хэмжээний хамгийн өндөр түвшний маш нууц мэдээлэлтэй танилцах болсонд сэтгэл түгшиж байгаагаа илэрхийлсэн байна.
ОХУ-д 1994-1997 онуудад ажиллаж байсан Доминик Каммингс нь Борис Жонсоныг дуулиан тарьсан олон шийдвэр гаргахад шийдвэрлэх үүрэг гүйцэтгэсэн гэж Британийн хэвлэл мэдээллийн хэрэгслүүд бичиж байсан. Жишээлбэл, Brexit-ийг саадгүй хэрэгжүүлэхийн тулд Британийн парламентын таван долоо хоног хүчээр амраах тухай шийдвэр нь Каммингсын санал байсан гэнэ.
"Daily Mirror" сонин нь Каммингсиыг Оксфордын их сургуулийн эртний ба орчин үеийн түүхийн ангийг төгссөн, Орост ажиллахдаа Самара хотоос Европ руу зорчигч тээврийн шинэ чиглэл нээхээр ажиллаж байсан ч төсөл нь бүтэлгүйтсэн, дээр нь өөрөө орос хэл мэддэггүй гэсэн байна. Харин Консерватив намыг дэмжигчдийн сайд дээр Каммингсыг орос хэлээр ярьдаг, Достоевскийн зохиолыг судалдаг, Оросын түүх соёлд хайртай хүн гэж бичсэн байжээ.
Каммингс нь Их Британид байхдаа Боловсролын сайд МайклГоувын туслахаар ажиллаж байгаад 2016 оны Brexit-ийн бүх нийтийн санал асуулгын үеэр Европын холбооноос гарахыг уриалагчдын "Vote Leave" хэсгийн тэргүүнээр ажиллаж, албан тушаал эрчимтэй ахисан байна.
Их Британийн түүхэнд Оросын тагнуулын албанд элссэн хүмүүс гадаад тагнуулын алба, сөрөг тагнуулын алба ба гадаад явдлын яам, хааны зөвлөх хүртэл өндөр албан тушаалд хүрч, маш нууц мэдээллийг тухайн үеийн Зөвлөлтийн удирдлагад өгч байсан тохиолдол бий. Энэхүү тагнуулын бүлэглэлийн гол гишүүдийн нэг болох КимФилби агсны "Миний нууц дайн" зохиол нь монгол хэл дээр орчуулагдан гарч байсан юм.
Сэтгэгдэл (0)
Сэтгэгдэл бичигдээгүй байна