Тэмдэглэл: Хайр өвтгөдөг. Гэхдээ, аз жаргалтайгаар...

Өвдөх, өвдөлт хэцүү.

Харин “аз жаргалтайгаар өвдөх” гэдгийг та хүлээн зөвшөөрөх үү? Хэрэв аз жаргалтайгаар өвдөж болдог бол тэр нь хайрын өвдөлт байх болов уу. Хайраас тийм л өвдөлтийг мэдрээрэй,  бас мэдрүүлээрэй.

Нэг.

Ид залуухан насны гал дөл хорин хэдтэй айлын ганц хүү. Дутагдаж гачигдахын бэрхшээлийг туулаагүйн гавьяа нь ижий аавынх нь цаг наргүй хөдөлмөр.

Элбэг дэлбэг бүхэн хүний зан аашийг эвддэг ч байж магад. Тэглээ гээд эцэг эх бүхэн үр хүүхдээ зориудаар гачигдуулж зүрхлэхгүй. Харин тэднийхээ тэр сэтгэлийг үл анзаардаг үр хүүхэд байж болохгүй. Тийм алдааг санаатай, санаандгүйгээр гаргасан бол дахиад алдахгүй байхад л болно. Хүний эцэг эх үр хүүхдээ ямар ч том алдааны ард ч уучилсаар суудаг өгөөмөр ачтанууд билээ.

Хоёр.

Амьдралын алхам бүр амар биш. Гараасаа чанга хөтлөлцөөд “чадна аа” гээд зориглоод эхлүүлсэн амьдралын онгоц нэгэнт хөдөлсөн л бол буцах боломжгүй. Учир нь тэр онгоцон дээр танд итгэсэн хань тань, танаас өөр ямар ч баатрыг мэддэггүй үрс тань бий. Тэднийхээ нүдэн дээр эргэж буцаж, итгэлийг нь эвдэж боломгүй. Ямар ч том бэрхшээлийг давах шат нь итгэлцэл болоод хүндлэл билээ. Анх л онгоцон дээр хөтлөлцөөд гарсан шигээ харилцааг үүрд хадгалахын тулд дандаа ярилцаарай.

Гурав.

Хамт байхдаа гол нь биш мартахгүй байхыг л хайр гэдэг. Дандаа сайн сайхныг хүсэж, дандаа зөвийг хийх нь хайранд зориулагдах хамгийн эрхэм үйл нь билээ.

Дөрөв.

Хамгийн тэсвэрлэшгүй өвдөлтийг эх хүн л мэдэрдэг. Гэхдээ тэр л өвдөлт хамгийн аз жаргалтай байдаг. Учир нь эх хүний амьдралын утга учир нь үр хүүхэд нь юм. Чангахан дуугаар зэмлэчхээд, бүлтгэр нүдийг нь харж нулимсаа нуудаг эх хүний сэтгэлээс үрийнх нь өчүүхэн ч сүүдэр ч олдохгүй. Эх нь үрээ, үр нь эхээ хайрладаг хайраар дэлхий эргэдэг байвал хэчнээн сайхан. Тэр эргүүлэх хүчний нэг нь танаас ундрах хүнлэг сэтгэл байгаасай.  

Тав.

Таныг хүндэлдэг, таны хариуцсан ажлыг та л хамгийн шилдгээр гүйцэтгэхийг хүлээн зөвшөөрдөг тийм хамт олон таны эргэн тойронд байгаа бол та хэчнээн их азтай вэ. Өрсөлдөөн хүнийг хүчирхэгжүүлдэг гэх ч урам, дэмжлэг түүнтэй  харьцуулшгүй чадалтай шүү. Өөрийн тань амжилтын төлөө чангаар баярлаж, алдааг тань чимээгүйхэн шивнэдэг найзууд танд олон байгаа бол танд бас баяр хүргэе.

Өөртөө дандаа сайхныг хүсдэг шигээ бусдад дандаа сайхныг хүсье. Хайр өвтгөдөг. Гэхдээ тэр өвдөлт нь хайртай учраас санаа тавьсан, хайртай учраас уучилсан, талархсан мэдрэмжээр илэрч байгаасай. Хайр өвтгөдөг. Гэхдээ аз жаргалтайгаар...