Өмнөговийн Гашуунсухайтын боомтоор нүүрсээ хил гаргахаар хэдэн өдрөөр дугаарладаг жолооч нарт бас нэгэн бэрхшээл тулгарчээ. Тэр нь эдийн засгийн дарамт бөгөөд нэгэн улстөрчийн “шахаа”, хувийн халаас руу ядарсан жолооч нарын мөнгө урсах үүд хаалга нээгдсэн байна.
Тодруулбал, хил гарахаар ирэх том оврын тээврийн хэрэгслүүдийг оруулах зогсоол буюу маш том хашаа барьсан бөгөөд тухайн хашаанд нэг тээврийн хэрэгсэл хоногийн 20 мянган төгрөг, чиргүүлтэй бол 30 мянган төгрөгийн төлбөр өгөх зохицуулалттай аж. Жолооч нар хил гарахын өмнө хэд хоног дугаарлах нь тодорхойгүй байдаг тул зогсоолын мөнгө төлөхөд бэрхшээлтэй байгаагаа хэлж байна.
Тэгвэл жолооч нарт санхүүгийн хүндрэл учруулж байгаа уг зогсоолыг УИХ-ын гишүүн А.Сүхбат барьсан бөгөөд зогсоолын төлбөр нь түүний халаасыг түнтийлгэх нь ээ.
Өнгөрсөн жилээс баригдаж эхэлсэн “Тайван зогсоол” гэх уг хашаа нь саяхан ашиглалтад орж, жолооч нарыг “Зогсоол ашиглалтад орсон учир автомашинаа зогсоолд байрлуулах” мэдээлэл өгсний дагуу мянга орчим тээврийн хэрэгсэл одоогоор уг зогсоолд ороод байгаа бөгөөд дугаарлалт нь болсон автомашин зогсоолоос гарах болоход “хоногийн 20 мянга” гэдэг үнийг хэлж, мөнгө нэхсэнээс үүдэн жолооч нарын эсэргүүцэл үүсчээ. Уг зогсоолыг “Түгээмэл түмэн хишиг” гэх компани ажиллуулж байгаа бөгөөд тухайн компанийг Г.Буяндэлгэр эзэмшдэг. Г.Буяндэлгэр нь Батдэлгэр треяд ХХК-ийг Агваансамдангийн Баттөгстэй хамтран эзэмшиж байгаа юм.
Одоогоор уг зогсоолын төлбөрийг төлж чадахгүй, “автомашинаа барьцаалуулсан” мянга орчим жолооч А.Сүхбатын хашааны үүдэнд тав дахь хоногтойгоо золгож, нүүрсний тээвэрлэлт зогсоод байгаа аж.
Сэтгэгдэл (0)
Сэтгэгдэл бичигдээгүй байна