Төрийн мэдлийн Төрийн банкны удирдлагууд ер нь сахилга муутай аж. Өдгөө захирлаар нь ажиллаж буй Д.Баярсайхан Санхүүгийн зохицуулах хорооны дарга байхдаа нэлээд хэл ам дагуулдаг байсан даа. "Анод"-ын дампуурал гэхчлэн анхаарал татсан олон асуудалд холбогдож байсан тэрбээр өдгөө Төрийн банкийг залуурдаж байна. Нэр сүр муутай хүн Төрийн банкийг удирдаж байгаатай зэрэгцэн тус банкны экс удирдлагууд ч элдэв асуудалд ээлж дараалан холбогдсоор байна. Хамгийн сүүлд гэхэд Төрийн банкны орлогч захирал асан Т.Дорждэрэмд анхан шатны шүүхээс 5.1 жилийн хорих ял оноов. Харин Т.Дорждэрэмд хахууль өгсөн гэх Ц.Алтансүхийг хөдөлмөрийн хөлсний доод хэмжээг 51 дахин нэмэгдүүлсэнтэй тэнцэх хэмжээний төгрөгөөр торгох ял оноожээ. Хэргийн үүх түүхийг эргэн сануулбал, "Дөрвөлж" компанийн захирал Л.Алтансүх нь орон нутгийн мэдлийн өмчийг Төрийн банкны 800 сая төгрөгийн барьцаанд тавихдаа Т.Дорждэрэмд 25 сая төгрөгийн хахууль өгснийг мөрдөн байцаалтын явцад цугларсан нотлох баримтаар тогтоосон байдаг.
Үүнээс гадна Т.Дорждэрэм нь 2016 оны УИХ-ын сонгуулийн дараа Ардчилсан намын нэр бүхий хүмүүст 100 орчим тэрбум төгрөгийн найдваргүй зээл гаргаж өгсөн нь шалгагдах үндэслэл болсон гэх мэдээлэл бий. Зарим эх сурвалж 100 тэрбум төгрөг биш 170 орчим тэрбум төгрөгийн асуудал яригдаж байгаа гэдгийг ч хэлж ярьсан байдаг. Гол нь Төрийн банкны зүгээс зээлийг олгохдоо, ямар ч барьцаа хөрөнгөгүйгээр олгосон гэгддэг бөгөөд Төрийн банкнаас тэрбум тэрбумаар мөнгө гадагшлуулах операцид тус банкны гүйцэтгэх захирал Б.Баттүвшин, Тэргүүн орлогч захирал Б.Онон нар ч холбоотой гэж хэлэх хүмүүс бий.
Тэгвэл нөгөө Б.Баттүвшин гэгч экс захирлын тухайд мөрийтэй тоглоомоос болж халхын шоронгийн атамануудын гарт үхэхээ шахсан тухай мэдээлэл нь хэвлэлийн хуудаснаа гарч байсныг эргэн дурдая. Ер нь Б.Баттүвшин тавьтир тааруу нэгэн байхыг үгүйсгэх аргагүй. Ямартаа л Үйлдвэр, хөдөө аж ахуйн яамны Жижиг, дунд үйлдвэрийн газрын даргаар ажиллаж байхдаа мөрийтэй тоглож байгаад цагдаагийнханд баригдаж байв. УИХ-ын гишүүн асан Р.Бадамдамдингийн хүү тэрбээр юм л бол мөрийтэй тоглох гээд байдаг, нэг ёсны донтой болсон гэх мэдээллийг ойр тойрных нь хүмүүс хэлж ярьдаг. Харин сүүлд дахиад л мөрийтэй тоглоомын газар тоглож байгаад, дээрэмдүүлж, хутгалуулсан байдаг. Тодруулбал, Сүхбаатар дүүргийн нэгдүгээр хорооны нутаг дэвсгэр буюу "Элчингийн хороолол"-д байрлах нийтийн орон сууцны найман давхарт мөрийтэй тоглож байсан хүмүүс рүү гэмт этгээдүүд халдаж, дээрэм хийсэн гэх хэргийн цаана Б.Баттүвшин нарын улстөр ,бизнесийн салбарын нэр бүхий хүмүүс халхын шоронгийн атамануудтай хамтдаа байсан билээ.
Тэгэхээр хувь намтар нь ч ийм л бараан нөхдүүд Төрийн банкийг залуурдаж байжээ, өнгөрсөн жилүүдэд. Т.Дорждэрэмийн тухайд 100 гаруй тэрбумын асуудлаар биш 25 сая төгрөгийн хахуулийн асуудлаар ял сонсоод байгаагийн цаана, бусад нөхдүүд гэмгүй өнгөрч байна уу гэдэг асуулт гарч ирж байгаа юм.
Эх сурвалж: Зариг.мн
Сэтгэгдэл (0)
Сэтгэгдэл бичигдээгүй байна