2020/10/01
USD 2,811

Америкчуудыг цалингийн татвараас чөлөөлөхөөр болжээ

З.Гантулга
2020/08/10

АНУ-ын Ерөнхийлөгч Дональд Трамп цар тахлын эдийн засгийн сөрөг үр дагаврыг багасгахад чиглэсэн дөрвөн шийдвэрт гарын үсэг зурсан байна. Конгресс дэх Ардчилсан намын төлөөлөлтэй эдийн засгийг дэмжих багц арга хэмжээний талаар тохиролцоонд хүрч чадаагүй учраас ийм замаар, Конгрессоос зөвшөөрөл авалгүйгээр асуудлыг түр ч болов шийдэх нь зүйтэй гэж үзсэн юм байна.

Энэ дөрвөн шийдвэрийн эхнийх нь цалингийн татварыг түр хугацаанд авахгүй байх тухай шийдвэр. Трамп нь Нью-Жэрсид болсон хэвлэлийн хурал дээр “Би жилдээ 100 мянган доллароос бага цалинтай америкчуудаас цалингийн татвар авахыг түр зогсоож байна” гэж мэдэгдсэн байна. Энэхүү шийдвэрийг наймдугаар сарын 1-ээс хойш төлөгдсөн цалинд хамруулах бөгөөд он дуустал татвар авахгүй аж. Мөн Трамп нь энэ шийдвэртэй холбоотойгоор “Хэрэв би арваннэгдүгээр сарын 3-нд дахин сонгогдвол энэ хугацаанд түр хойшлуулсан татварыг нөхөж авахгүй болгохоос гадна цалингийн татварыг нэг мөр багасгана” гэж мэдэгджээ.

Удаах шийдвэрээрээ Трамп ажилгүйдлийн тэтгэмжийн хэмжээг нэмсэн байна. Тэрээр “Нэмэлт тэтгэмжийн хүрээнд долоо хоногт 400 доллар нэмж олгох арга хэмжээ авлаа” гэжээ.

Гуравд дах шийдвэр нь цах тахлын үеэр түрээс төлөөгүй иргэдийг орон байрнаас нь албадан нүүлгэхээс сэргийлэхэд чиглэгдсэн юм байна. Трамп “Би хүмүүсийг орон, байрнаасаа албадлагаар нүүхээс хамгаалж байна. Цар тахал манай улсад ирсэн нь тэдний буруу биш. Энэ бол Хятадын буруу. Хүмүүс албадлагаар нүүх ёсгүй. Миний гарын үсэг зурсан шийдвэр энэ асуудлыг үндсэндээ шийднэ” гэжээ. Иргэдийг албан нүүлгэхэд хориг тавих тухай холбооны Засгийн газрын өмнөх шийдвэрийн хугацаа нь долоодугаар сарын 31-нд дууссан юм байна.

Дөрөв дэх шийдвэр нь их, дээд сургуулийн оюутнуудын сургалтын төлбөрийг хөнгөвчлөхтэй холбоотой юм байна.

Үүнээс гадна цар тахлаас эдийн засаг, иргэдийн амьжиргаанд үзүүлж байгаа сөрөг нөлөөг багасгах бусад арга хэмжээг удахгүй авахаар болсон байна. Трамп “Түүнчлэн бид иргэдийн орлогын ба хөрөнгийн өсөлтийн зэрэг бусад татваруудыг ахин багасгах боломжийг авч үзэх бодолтой байгаа. Энэ талаар удахгүй мэдэгдэх болно” гэжээ.

АНУ-ын Конгрессын Төлөөлөгчдийн танхимын Ардчилсан намын олонхын удирдагч Нэнси Пэлоси нь Трампын энэ шийдвэрийг эрс шүүмжилсэн байна. Тэрээр “Үндсэн хуульд нийцэх асуудлыг судалдаг миний зөвлөхүүд эдгээр шийдвэрийг Үндсэн хууль үл нийцсэн, ямар ч утгагүй гэж хэлсэн” гэжээ.


Сэтгэгдэл (1)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
174.237.13.100 |   2020/08/10
Deferred.... tiiim bolohooor tsag tuhaid ni tuluuud yavsan ni deeer baihooo... aihtar neg ih nuluuuu uzuuuleeed baihaaar action bisheee! rain 1200$ iiin stimulus checkeeee senate batlah heregtei bn.
Хариулах