Англи залуу Солонгосын од шиг харагдахын тулд 149 мянган фунт зарцуулжээ

Англи залуу Өмнөд Солонгосын “BTS” хамтлагийн Чиминтэй адил болохын тулд гоо сайхны мэс засал хийлгэхэд 149 мянган фунт /1 английн фунт= 3,722.00₮ / зарцуулсан тухай “Unilad” бичсэн байна. Оли Ландон гэгч 30 настай залуу Чиминтэй адил болохын тулд долоон жилийн дотор хамрын хэлбэрээ таван удаа өөрчилж, зовхио янзлуулж, арьсаа татуулсан байна. Зөвхөн сүүлийн ганц жилийн дотор гэхэд л 24 мянган фунтын гоо сайхны мэс засал хийлгэжээ. Ландон нь шүтдэг дуучинтайгаа улам адил болохын тулд цаашдаа ч гоо сайхны шинэ мэс засал хийлгэх төлөвлөгөөтэй байгаа гэдгээ “Unilad”-д ярьжээ. 

Тухайлбал, гуя ба гэдэснийхээ өөхийг соруулж, уруулдаа байнгын суулгац шахуулж, зовхио татуулах бас нэг хагалгаа хийлгэнэ гэжээ. Тэрээр “Би өөртөө илүү итгэлтэй болсон болохоор сэтгэл хангалуун байна. Өөртөө баяр баясал авчирдаг зүйлс дээр анхаарч сурсан” гэжээ. Ландон нь 2013 онд Өмнөд Солонгост амьдарч байхдаа “BTS” хамтлагийн шүтэн бишрэгч болсон юм байна. Тэрээр “Миний амьдрал зөвхөн K-pop-той холбоотой байгаасай гэж хүсдэг.Чимин бол миний хувьд төгс төгөлдрийн туйл болохоор би түүн шиг харагдахыг хүсдэг. Түүний уруул, эрүү, дуу хоолой, бүх зүйл” гэжээ.