Хятадын хөрөнгө оруулалтыг “дайсагнасан” гэж тодорхойлов

АНУ-ын удирдлагууд Украйны аж үйлдвэрлэлд хийж байгаа Хятадын хөрөнгө оруулалтад сэтгэл түгшиж байгаагаа албан ёсоор мэдэгдэв. АНУ-ын Төрийн нарийн бичгийн дарга МайклПомпео бямба гарагт Украйны Ерөнхийлөгч Зеленскийтэй утсаар ярихдаа БНХАУ-ын хөрөнгө оруулалтыг дайсагнасан гээд Украйны “Мотор Сич” компанийг Хятад худалдан авах гэж байгааг онцолжээ.

Нисэх онгоц, нисдэг тэрэгний дэлхийд томд тооцогдох үйлдвэрүүдийн нэг болох “Мотор Сич” компанийн хувьцааны хяналтын багцыг Хятад худалдан авах гэж байгааг АНУ тууштай эсэргүүцсээр ирсэн. Тухайлбал, 2019 онд Ерөнхийлөгчийн Аюулгүй байдлын зөвлөх байсан Жон Болтон ийм наймаа хийхийг зөвшөөрүүлэхгүй гэж мэдэгдэж байсан.

БНХАУ нь онгоц, нисдэг тэрэгний орчин үеийн хөдөлгүүрийн үйлдвэрлэлийн түвшнээр АНУ-аар олон жилээр хоцорсон гэж үздэг. Ийм нөхцөлд Хятад нь Оросын байлдааны нисдэг нисдэг тэрэг, онгоцны хөдөлгүүр үйлдвэрлэдэг байсан компанийг худалдан авбал хоцрогдлоо богино хугацаанд нөхөөд, Америкт аюул учруулахуйц хэмжээнд хүрнэ гэж болгоомжлол байгаа юм байна.

2015 оны “Майдан” хувьсгалын дараагаар Украйны шинэ удирдлага нь “Мотор Сич” компанийн бүтээгдэхүүнийг ОХУ-д экспортлохыг хориглосон бөгөөд энэ хориг ойрын 10-15 жилдээ хэвээр байна гэдэгт бүгд санал нийлж байна. Гэтэл “Мотор Сич” үндсэн ашиг өгдөг голлох загварыг хөдөлгүүрүүдийг 90 хувийг ОХУ худалдан авдаг байж. Ийм хориг хориг арга хэмжээний дараагаар тус компани дампуурах аюултай тулгарсан тул Украйны удирдлагууд хувьцааны хяналтыг багцыг Хятадын компанид зарж, шинэ хөрөнгө оруулалт авч, зах зээлээ тэлэх замаар аврахаас өөр арга байхгүй гэж шийджээ.

Хятадын компани нь төлөөний компаниар дамжуулан хяналтын багцыг хэдийн худалдан авсан бөгөөд одоо энэ наймааг Украйны эрх баригчид зөвшөөрөх л үлдээд байгаа аж.