Б.Баасандорж: Нэр бүхий бөхчүүдийн “А” сорьцоос допинг илэрсэн нь үнэн

 Үндэсний их баяр наадмын хүчит бөхийн барилдааны бөхчүүдээс допинг илэрсэн гэх мэдээлэл байна. Тодруулбал, энэ жилийн наадмын үзүүр бөх Н.Батсуурь, Р.Пүрэвдагва нараас допинг илэрсэн  талаар эх сурвалжууд мэдээллээ. Допинг илэрсэн гэх нэг бөхийн нэр тодорхойгүй байна. 

Энэ талаар бид Үндэсний баяр наадмыг зохион байгуулах хорооны Бөхийн салбар комиссын дарга Б.Баасандоржоос тодрууллаа. Тэрбээр "Жил бүрийн үндэсний их баяр наадмаар бөхийн барилдаанд 5-аас дээш давсан буюу 16 бөхчүүдээс  сорьцын шинжилгээ авдаг журамтай. Энэ дагуу энэ жилийн баяр наадмын 16 бөхөөс шинжилгээ авсан. Нэр бүхий бөхчүүдэд шинжилгээний хариу ирсэн.  Одоогоор бөхчүүдийн нэрсийг хэлж болохгүй. Тодорхой хугацааны дараа зарлана. Нэр бүхий гишүүдээс допинг илэрсэн нь үнэн. Шинжилгээг Допингийн эсрэг үндэсний төв авсан. Шинжилгээний А сорьцын дүн есдүгээр сарын 8-нд комисст ирсэн. Тухайн үед нь тэдгээр бөхөд мэдэгдсэн байдаг. А сорьцийн дүнг хүлээн зөвшөөрөх эсэхээ 10 хоногийн дотор эргээд хариу мэдэгдэх ёстой. Хүлээн зөвшөөрөхгүй гэж үзвэл В сорьцийн шинжилгээгээ өгөх эрх нь нээлттэй. Ийм учраас Үндэсний баяр наадмыг зохион байгуулах хорооны зүгээс дараагийн шинжилгээний хариу гартал бөхчүүдийн нэрийг зарлаж болохгүй. Нэр бүхий бөхийн В сорьц эерэг гарвал Баяр наадмын тухай хууль болох холбогдох дүрэм журмыг үндэслэж хариуцлага ярих дараагийн асуудал яригдана” гэлээ.