ТАНИЛЦ: Халуун ус хязгаарлах бүс, хороолол

Долоодугаар сарын 20-ноос эдгээр байршлуудад халуун ус хязгаарлана

Улаанбаатар дулааны сүлжээ ТӨХК-иас зуны их засварын төлөвлөгөөт зогсолтын хүрээнд 2026 оны долдугаар сарын 20-ноос наймдугаар сарын 8-ныг хүртэл зарим хэрэглэгчийн халуун усны хангамжийг түр хугацаагаар хязгаарлахаар боллоо. 

Төлөвлөгөөт зогсолтод дараах байршлууд хамрагдана. Үүнд:

• 1бвгд магистраль: Хурд, Эрэл, Жигүүр Гранд орон сууцны хороолол, Баянгол зочид буудал, Улсын драмын эрдмийн театр, Төв шуудан, Хангарьд ордон, Засгийн газрын ордон, Чингэлтэй дүүргийн Эрүүл мэндийн төв болон УДДТ-37, 42-оос хангагддаг хэрэглэгчид.
• 2бв магистраль: Улсын I төв эмнэлэг, МУБИС, Нийслэлийн Өргөө амаржих газар, СЭЗДС, Сайд нарын II эмнэлэг, УСУГ орчим, Нийгмийн эрүүл мэндийн хүрээлэн, Английн Элчин сайдын яам орчмын хэрэглэгчид.
• 3аб магистраль: Төрийн тусгай хамгаалалтын газар, ОХУ-ын Элчин сайдын яам, Улсын их дэлгүүр, 40, 50 мянгатын орчмын хэрэглэгчид.
• 5бв магистраль: Цагдаагийн авто бааз, Замын цагдаагийн газар, Стар Эстэйтс, Континентал зочид буудал, Шинэ үе сургууль орчмын хэрэглэгчид.
• 11ж магистраль: Залуучуудын соёлын төв, Төв усан бассейн, БНХАУ-ын Элчин сайдын яам, ШУТИС орчмын хэрэглэгчид.

Засварын хугацаанд ямар ажил хийх вэ?

Засварын хүрээнд дулааны шугам сүлжээний найдвартай ажиллагааг хангах зорилгоор дараах ажлуудыг гүйцэтгэнэ.

• 1бвгд, 2б, 3аб, 5бв, 11ж магистралийн шугамыг долдугаар сарын 19-26-ны хооронд ажиллагаанд залгах,
• ДХ-242–ДХ-244 хооронд 2Ф350 мм-ийн голчтой 176 хос метр шугамыг шинэчлэх,
• ДХ-244–ДХ-249 хооронд 2Ф300 мм-ийн голчтой 362 хос метр шугамыг шинэчлэх,
• ДХ-11134, ДХ-5114, ДХ-569-2, ДХ-240, ДХ-196 цэгүүдийн таслах болон холбоосны хаалтуудыг шинэчлэн солих,
• Урсгал засвар, техникийн бусад шаардлагатай ажлуудыг хийх юм.