2020/10/29
USD 2,811

Орос улс Лукашенког Беларусийн хууль ёсны ерөнхийлөгч болохыг хүлээн зөвшөөрч, $1.5 тэрбумын зээл амлажээ

Үндэсний шуудан
2020/09/15

Сар гаруйн өмнө зургаа дахь удаагаа сонгогдсон Беларусийн ерөнхийлөгч Александр Лукашенко өчигдөр Сочи хотноо ОХУ-ын ерөнхийлөгч Владимир Путинтэй ганцаарчлан уулзсан байна.

Сонгуулийн дүнг хүлээн зөвшөөрөхгүй байгаа сөрөг хүчний нэр дэвшигч Светлана Тихановская хэрвээ тэмцэгчид засгийн эрхийг авбал уг уулзалтын үеэр тохирсон асуудлууд бүгд хүчингүй болохыг анхааруулжээ.

Кремлийн хэвлэлийн төлөөлөгч Дмитрий Песков “Ноён Лукашенко бол Беларусийн хууль ёсны ерөнхийлөгч мөн бөгөөд ерөнхийлөгч Путинтэй улс хоорондын асуудлыг хэлэлцэх эрхтэй хүн болно. Сонгуулийн үр дүнг хүлээн зөвшөөрөхгүй байгаа ах дүү Беларусийн ард иргэдийг ч бид хүндэлж байгаа. Гэхдээ Беларусьт бүх зүйл үндсэн хуулийн хүрээнд явагдахыг бид хүсэж байна” хэмээн мэдэгджээ.

Сочид болсон уулзалтын үеэр ОХУ-ын ерөнхийлөгч Владимир Путин $1.5 тэрбумын зээл шинээр авах Лукашенкогийн хүсэлтийг зөвшөөрсөн юм.

Песков энэхүү зээлийг Беларусийн дотоод хэрэгт Москвагийн зүгээс оролцсон явдал биш, зарим хэсэг нь ОХУ-д төлөх ёстой хуучин өрийнх нь бүтцийг шинэчлэхэд зориулагдахыг  тайлбарласан байна.

Владимир Путин уулзалтын үеэр Беларусийн иргэд улс орныхоо дотоод асуудлыг гадны нөлөөгүй шийдэж чадна гэдэгт итгэж байгаагаа илэрхийллээ.

Одоо Оросын зэвсэгт хүчний зарим анги нэгтгэл Беларусьт хамтарсан байлдааны сургуулилалтад оролцож байгаа юм. Эдгээр цэргүүд Беларусьт байнга үлдэж магадгүй гэсэн болгоомжлол Өрнөдийн хэвлэлүүдээр бичигдэж байна.

Өчигдрийн уулзалтын эхэнд Путин хэлэхдээ Оросын цэргүүд төлөвлөгөөний дагуу сургуулилалтад оролцсоныхоо дараа буцаж эх орондоо ирэхийг мэдэгдсэн юм.

Тэрбээр энэхүү хамтарсан сургуулилалтыг өнгөрсөн онд гарсан төлөвлөгөөний дагуу есдүгээр сарын 14-ний өдөр эхэлж буйг баталсан  байна.

Наймдугаар сарын 9-ний өдөр болсон сонгуульд Лукашенко 80 орчим хувийн санал авч, зургаа дахь удаагаа ерөнхийлөгчөөр сонгогдсон бол түүний өрсөлдөгч Светлана Тихановская 10 орчим хувийн саналтай удаалж байсан юм.

Сонгуулийн дараа Беларусийн нийслэл Минск болон бусад том хотуудад сонгуулийн үр дүнг эсэргүүцсэн иргэдийн жагсаал тасрахгүй байгааг Russia Today сурвалж мэдээлж байна.


Сэтгэгдэл (2)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
81.185.170.61 |   2020/09/15
Орос ,Хятад хоёр бол хамгийн адгийн хөршүүд
Хариулах
64.119.26.224 |   2020/09/15
орос хөршүүдээ дандаа ядуу бурангуй болгох гэж явдаг хамгийн хөгиин новшийн юм хийж явна
Хариулах