2020/12/02
USD 2,811

Хүнсний худалдааны төвүүдэд халдвар хамгаалал хангалтгүй байна

О.Шүрэнцэцэг
2020/11/13

Бүх нийтийн бэлэн байдлын зэрэгт шилжсэнтэй холбогдуулан хүнсний худалдаа, эрүүл мэндийн байгууллага, харилцаа холбоо, банк зэрэг 11 чиглэлийн байгууллага халдвар хамгааллын дэглэмийн дор үйл ажиллагаа явуулж байна. Мэргэжлийн хяналтын ерөнхий газрын Шуурхай штабаас иргэдэд үйлчилж буй хүнсний худалдаа, эмийн сан, банкны салбарт иргэд, үйлчлүүлэгчид, ажиллагсдын биеийн халууныг хэмжих, гар халдваргүйжүүлэх, зөвхөн амны хаалттай иргэнд үйлчлэх, ажлын байр, үйлчилгээний талбай, АТМ-ын товчлуур зэргийг ариутгаж халдваргүйжүүлж буй байдалд тандалт хийлээ.


Тандалтаар Баялаг Ундраа худалдааны төв, Барс хүнсний худалдааны захуудад нэвтэрч буй иргэдийн биеийн халууныг хэмжихгүй, гарыг халдваргүйжүүлэхгүй байгаагаас гадна иргэдийн бөөгнөрөл үүссэн, худалдаачид амны хаалтыг буруу зүүх зэрэг зөрчил илэрч байна. Мөн цэвэрлэгээ, ариутгал хийгдээгүй, иргэдийн хөдөлгөөн, бөөгнөрөлд ямар нэг зохицуулалтгүйгээр ажиллаж байна.

Түрээсийн байранд үйл ажиллагаа явуулж буй эмийн сан, үүрэн телефоны үйлчилгээний цэгүүдэд иргэдийн биеийн халууныг хэмжихгүй, хүнснээс бусад төрлийн худалдаа эрхэлдэг зарим иргэдийг “тооллого хийх, засвар хийх” зэрэг шалтгаанаар ажиллуулж байлаа. Иймд тухайн байрыг түрээслэгчдэд халуун хэмжих, халдваргүйтгэл хийхийг нэгдсэн байдлаар зохицуулах, Засгийн газрын 178 дугаар тогтоолыг хэрэгжүүлж ажиллахыг анхааруулж, улсын ахлах байцаагчийн зөвлөмж хүргүүлж, зарим зөрчлийг газар дээр нь арилгууллаа. Худалдааны төвүүдэд коронавируст халдвараас урьдчилан сэргийлж иргэдийн хамгийн их гар хүрдэг хэсэг болох түрдэг тэрэг, сагсны бариул, хаалганы бариул, ПОС машины товчлуур, хурууны хээ уншуулах төхөөрөмж зэргийг тогтмол халдваргүйжүүлж, ажиллагсдыг амны хаалт, бээлийтэйгээр иргэдэд үйлчлэх, хүнсний бүтээгдэхүүний чанар, аюулгүй байдал, хангамжид анхаарахыг мөн зөвлөлөө.


Тандалтаар эдгээр зөрчил хүнсний худалдааны төвүүдэд нийтлэг илэрч байгаа тул Хүнсний худалдаа эрхлэгч аж ахуйн нэгж байгууллага, төвүүдэд ариутгал халдваргүйтгэлийн бодистой угаалга цэвэрлэгээг сайтар хийж иргэд, үйлчлүүлэгчдийг коронавирусийн халдвараас урьдчилан сэргийлэхийг анхааруулж байна.

Иргэд хүнсний худалдааны төв, АТМ зэргээр үйлчлүүлэхдээ амны хаалт, бээлий өмсөх, бохирдсон гадаргууд хүрсний дараа гараа савандаж угаах, зориулалтын уусмалаар халдваргүйжүүлж, хүн хооронд 1.5 метрээс багагүй зай барихыг зөвлөж байна.

Тандалт, хяналт шалгалт үргэлжилнэ.


Сэтгэгдэл (2)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
192.82.71.6 |   2020/11/14
Барс худалдааны төв үнэхээр бохир. Халуун үзэх нь бүү хэл бээлий ч өмсөхгүй худалдаа хийж бна бна лээ. Бүх юмны үнэ 500 аас дээш 1000, 1500 ₮ -өөр өссөн. Ж: 4 хоногийн 4700 аар авсан утёнок 5100 болж, 8500 аар авсан эко нойлын цаас 8800₮, 4500 байсан бор элсэн чихэр 5500 болж, 3500 байсан цагаан будаа 4000 болсон байсныг аргагүй л авсан. Өмнө өдөр 150₮ байсан маск 300₮ өөр олдохгүй хирнээ хайрцаг хайрцгаар нь гадагш өгч гаргаж, мөн ардаа нууж байв. Манайхан ийм л хүмүүс. Барсыг эмхэлж цэгцлэхгүй бол маш бохир, заваан удирдлагагүй мэт газар.
Хариулах
192.82.71.182 |   2020/11/13
БҮХ МӨНГӨН ГҮЙЛГЭЭГ ГАР УТСААР ХИЙГЭЭД БЭЛЭН МӨНГӨ БАРИХГҮЙГЭЭГЭЭР ЗОХИЦУУЛВАЛ ӨНДӨР ҮР ДҮНТЭЙ. ХАРИН ИНТЕРНЕТ БАНКНИЙ ШИМТГЭЛИЙГ ИРГЭН БИШ УЛСААС БОЛОН БАНКНААС ЗОХИЦОЖ ТӨЛӨХӨӨР ХИЙХ ХЭРЭГТЭЙ ГҮЙЛГЭЭНИЙ ШИМТГЭЛ МАШ ИХ ТӨЛТӨГ ЭНЭ БОЛ ДЭНДҮҮ ШУНАЛТАЙ ҮЙЛ!!!
Хариулах