Монгол улсын Засгийн газрын хуралдаанаар айл өрх, зарим ААН-үүдийн хэрэглээний цахилгааны төлбөр, ус, дулаан, хогны төлбөрийг долоон сарын хугацаанд чөлөөлж, тэглэж байгаа тухай хэлэлцэн баталсан тухай МУ-ын Ерөнхий сайд У.Хүрэлсүх мэдэгдлээ. Монгол улсын нийт айл өрхүүдийн цахилгааны төлбөрийг 2021 оны 07 дугаар сарын 01-ний өдөр хүртэл чөлөөлж, 100 мкв хүртэлх талбайтай орон сууцанд амьдардаг иргэдийн дулаан, ус, хогны үнийг мөн тэглэж байна. Сайжруулсан шахмал түлшний үнийг 50 хувиар бууруулаад удаагүй байгаа бол өнөөдрөөс эхлэн 75 хувь хүртэл бууруулж нэг шуудай нүүрсний үнэ 973 төгрөг болж байгаа юм. Ийнхүү шахмал сайжруулсан түлшний үнийг хөнгөлж буй асуудлыг “Эрдэнэс Таван Толгой” ХК хариуцаж байгаа юм байна.
Харин дээрхи арга хэмжээнүүдийн санхүүжилтийн эх үүсвэрийг “Эрдэнэт үйлдвэр” ТӨҮГ хариуцна гэдгийг МУ-ын Ерөнхий сайд У.Хүрэлсүх хэллээ. Учир нь “Эрдэнэт үйлдвэр” ТӨҮГ ашигтай ажиллаж 2019 онд 963 тэрбум төгрөгийн татвар төлсөн бол 2020 онд 1 их наядыг давсан татварыг улсад төлсөн. Энэ жил мөн ийм хэмжээний татвар төлнө. Нийт долоон сарын хугацаанд хэрэгжих уг дэмжлэгт “Эрдэнэт үйлдвэр” ТӨҮГ 650 гаруй тэрбум төгрөгийн санхүүжилтийг гаргах юм байна. Тиймээс талх болон өргөн хэрэглээний бараа бүтээгдэхүүний үнэ өсөхгүй хэмээн тооцож байгаа юм байна. Харин ААН байгууллагууд ажлын байрыг хадгалах тал дээр онцгой анхаарах хэрэгтэй хэмээн хэллээ.
Сэтгэгдэл (0)
Сэтгэгдэл бичигдээгүй байна