Н.Энхболд: ЕС асан, УИХ-ын гишүүн Ж.Эрдэнэбатын хэрэг олон улсын анхааралд орлоо

Олон Улсын Парламентийн Холбооноос манай улсад хэрэг үүсгэсэн асуудлаар өнөөдөр Халдашгүй байдлын дэд хорооны дарга Н.Энхболд мэдээлэл хийлээ. Тодруулбал, ОУПХ нь Монгол улсын парламентийн гишүүнийг хамгаалахтай холбоотой нийт 8 асуудлыг хэлэлцэж, хоёрт нь хэрэг нээж шалгахаар шийдвэрлэсэн байна. Эхнийх нь УИХ-ын гишүүн агсан С.Зоригийг хөнөөсөн хэрэг бөгөөд, 2 дахь нь УИХ-ын гишүүн Ж.Эрдэнэбатыг хууль бусаар баривчлан, хорьсон хэрэг юм. Ийнхүү парламентын гишүүдийн Хүний эрхийн хороо 2020 оны 10 сарын 31-ны өдрийн 162 дугаар хуралдаанаар Ж.Эрдэнэбатыг хууль бусаар баривчлан, хорьсон асуудлыг хэлэлцэж, уг асуудлыг хэрэг нээн хянан шалгахаар шийдвэрлэжээ. Ж.Эрдэнэбатад хүний эрхийн дараах зөрчлүүдийг үйлдсэн хэмээн үзэж байгаа аж. Эдгээр нь: 

Мөрдөн шалгах ажиллагаа хууль журмын дагуу явагдаагүй

Шүүх ажиллагаа шударга явагдаагүй

Парламентийн гишүүний халдашгүй байдалд халдсан зэрэг зөрчлүүд аж. 

ОУПХ нь 1889 онд 179 улсын парламентийн гишүүнчлэлтэйгээр байгуулагдаж байсан бөгөөд парламентын гишүүдийн эрхийг хамгаалах, улмаар парламентын институцийг хамгаалах зорилгоор 1976 онд Парламентын гишүүдийн Хүний эрхийн хороог байгуулж байжээ. Энэ хүрээнд саатуулагдсан парламентын гишүүнийг суллах, өмнө нь чөлөөлөгдсөн парламентын суудалд эгүүлэн тогтоолгох, хохирсон тохиолдолд нөхөн төлбөр олгуулах, зөрчлийг мөрдөн шалгах, буруутай этгээдэд хууль ёсны дагуу арга хэмжээ авах зэрэг олон хэлбэрийн арга хэмжээ авч хэрэгжүүлдэг юм.