БНХАУ ба Туркийн улсуудын гадаад хэргийн сайд нар утсаар ярьж, зарим чухал асуудлаар санал солилцсон тухай “Синьхуа” агентлаг мэдээлсэн байна. Туркийн Гадаад хэргийн сайд М.Чавушоглу нь дараа жил энэ хоёр улсын хооронд дипломат харилцаа тогтоосны 50 жил болох гэж байгаатай холбоотойгоор хоёр улсын харилцааг шинэ түвшинд гаргахад бэлэн гээд корона вирусийн эсрэг Хятадын вакциныг аюулгүй гэж үзэж байгаа тул нэн даруй худалдан авахаар шийдсэн тухайгаа дуулгажээ.
Хятадын Гадаад хэргийн сайд Ван И нь Бээжин корона вирусийн эсрэг тэмцэлд Туркт бүх талын дэмжлэг үзүүлэхээр бэлэн гэдгийг онцолсон байна. Мөн алан хядлагын эсрэг тэмцэлд давхар стандарт мөрддөг явдлыг арилгах хэрэгтэй гээд Шинжаанд үйл ажиллагаа явуулдаг “Дорнод Туркестаны исламын хөдөлгөөн” гэдэг байгууллагыг НҮБ-ын Аюулгүйн зөвлөл алан хядах байгууллага гэж хүлээн зөвшөөрсөн, энэ байгууллагын эсрэг тэмцэх нь бүх улс орны үүрэг гэж мэдэгджээ.
Үүний хариуд Туркийн сайд өөрийн улсыг НҮБ-ын АЗ-ийн шийдвэрийг тууштай дагаж, мөрдөнө гээд Хятадын тусгаар тогтнол, газар нутгийн бүрэн бүтэн байдлыг эвдэхийг ямар ч улсад зөвшөөрөхгүй гэсэн байна.
Туркийг ОХУ-аас С-400 систем худалдан авсны хариуд АНУ-ын зүгээс хоёр өдрийн өмнө хориг арга хэмжээ авсны дараа ийнхүү БНХАУ ба Туркийн Гадаад хэргийн сайд нар утсаар ярьсан тохиолдлын зүйл биш гэж шинжээчид үзжээ. Исламын шашныг хамгаалагч гол улс гэж өөрийгөө харуулахыг хичээж байгаа Туркийн Гадаад хэргийн сайдаас Шинжааны салан тусгаарлагч лалын шашинтнуудыг бүлэглэлд дэмжлэг үзүүлэхгүй гэсэн амлалтыг авна гэдэг БНХАУ-ын хувьд тун муугүй ололт гэсэн байна. Туркийн хувьд АНУ-ын хориг арга хэмжээнд өртөөд байгаа Бээжинтэй, тэр дундаа хамгийн их шүүмжлэл дагуулдаг Шинжааны асуудлаарсанал нэг гэдгээ харуулж бие даасан бодлого явуулдаг, ямар ч хориг арга хэмжээнээс айхгүй гэдгээ харуулсан. Гэхдээ энэ бүхнийг Хятадын явуулж байгаа “вакцины гадаад бодлого”-ын бас нэг ялалт үзэж байгаа юм байна. Корона вирусийн улмаас Туркийн аялал жуулчлалын салбар ихээхэн хохирол амсаад байгаа тул вакцин нь тус улсын эдийн засагт амин чухал ач холбогдолтой болж хувираад байгаа аж.
Сэтгэгдэл (0)
Сэтгэгдэл бичигдээгүй байна