Иргэн О: Шинжилгээний хариу эерэг гараад эмнэлэгт хэвтэж байтал огт шинжилгээ өгөөгүй газраас таны хариу сөрөг гарлаа гэж мессеж ирсэн

Буяны ажилд оролцох болсон Иргэн О нь БЗД-ийн 48 дугаар сургуульд дөрөвдүгээр сарын 09-ны өдөр шинжилгээ өгөхөд 14-нд хариу нь эерэг гарчээ. Улмаар өчигдөр эмнэлэгт хүргэгдэн эмчлүүлж байтал өнөөдөр /2021.04.19/ шинжилгээ огт өгөөгүй газрын байршлаар таны шинжилгээний хариу "сөрөг" гарлаа гэх мессеж иржээ. Иргэн О-гоос бид болсон асуудлыг тодрууллаа.

Таны хувьд хэзээ, хаана шинжилгээ өгсөн бэ? 

-Ээж маань өөд болоод буяны ажилд оролцох гээд дөрөвдүгээр сарын  сарын 09-нд Сансарт байрлах 48 дугаар сургууль дээр PCR шинжилгээ өгсөн.  Шинжилгээний хариу дөрөвдүгээр сарын 14-нд эерэг гараад өчигдөр  /2021.04.18/-нд эмнэлэгт хэвтсэн. 

Та дахин PCR шинжилгээ өгсөн үү?

-Огт өгөөгүй байхад  өнөө өглөө / 2021.04.19/ миний утсанд таны шинжилгээний хариу "сөрөг" гарлаа гэсэн мессеж ирсэн байна.Гайхаад, ороод хартал 04 сарын 16-нд БГД-т өгөөд БГД-ийн лабораторид шинжлээд 18-нд сөрөг гаргасан байна.Би дөрөвдүгээр сарын 09-нд Сансарын 48 дугаар сургуулиас өөр газарт PCR шинжилгээ огт өгөөгүй.Гэтэл яагаад өөр газар өгсөн болгож, сөрөг гарсан байсныг ойлгохгүй байна.

Та ХӨСҮТ рүү хандаж үзсэн үү? Ямар тайлбар хэлсэн бэ?

- БГД-ийн Өрхийн эрүүл мэндийн төв рүү залгахад шинжилсэн гээд эмчийнх нь дугаарыг өгсөн. Энх Өрхийн эрүүл мэндийн төвийн эмчээс нь асуутал "мэдэхгүй, би лабораториас асуугаад хэлье" гэсэн. Шинжилгээ өгөөгүй байхад миний нэрийг оруулаад сөрөг гээд тавина гэдэг чинь юу гэсэн үг вэ, үнэхээр ойлгохгүй байна.

Танд халдварын шинж тэмдэг илэрсэн үү? Биеийн байдал нь ямар байна. 

-Шинж тэмдэг илэрсэн. Халдвар аваад гэртээ дөрөв хоног байж байгаад өөрөө арай гэж хөөцөлдөж байж эмнэлэг бараадсан. ХӨСҮТ рүү залгахаар таны биеийн байдал хөнгөн байна гэнэ. Ганц ч удаа үзээгүй байж хөнгөн байгааг нь яаж ч мэдээд байдаг юм, огт ойлгомжгүй. Заавал хүндрүүлж байж эмнэлэгт хүргэгдэх ёстой юм шиг л 119 утас болон 110 гээд дугаарууд луу залгахаар утсаа авахгүй, нэг бол ХӨСҮТ рүү ярь гээд байнга нэгэн рүүгээ чихээд үнэхээр ямар ч хариуцлага гэж зүйл алга.  

Танай гэр бүл, ах дүү нараас халдвар илэрсэн үү? 

-Манай нөхөр эерэг, эгч маань эерэг гарсан. Ахын маань хүү ковидын халдвар авснаа мэдэхгүй,  хүндэрч амиа алдсан.Сахарын өвчтэй, дээр нь халдвар аваад хүндэрч, сэхээнд байж байгаад тэсэлгүй өнгөрчихөөд байна. Хоёрын хоёр хүнээ алдаад, сэтгэл санаа хямраад хүнд байхад яагаад миний мэдээлэл хаа байсан ямар ч харъялалын биш БГД-ийн Эрүүл мэндийн төвд очоод, өөрөө ч өгөөгүй шинжилгээний хариу сөрөг гарчихсан байгаад гайхаж, гомдолтой байна.Манай нөхөр бид хоёроос халдвар илэрчихээд байхад одоо болтол манай  орцонд ариутгал халдваргүйтэл хийж, байрыг тусгаарлалтад аваагүй гэсэн. Орц, байраар дамжиж халдвар бүртгэгдэх аюултай гэж ЭМЯ-наас анхааруулдаг хэрнээ яагаад ийм хайхрамжгүй, байдалтай байгааг үнэхээр гайхаж байна.

Бидэнд хандаж, мэдээлэл өгсөн танд баярлалаа.