2021/05/19
USD 2,811

Хятад шинэ цөмийн шумбагч онгоц зэвсэглэлдээ авчээ

Н.Мичидмаа
2021/05/03

Хятадын Ардын чөлөөлөх армийн Тэнгисийн цэргийн хүчний зэвсэглэлд шинээр орсон стратегийн цөмийн шумбагч нь АНУ газар нутгийн дурын цэгт цохилт өгөх чадвартай пуужин тээж байгаа тухай “South China Morning Post” сонин мэдээлжээ.

 “Цзинь” 094A төслийн энэхүү шинэ шумбагчийг өнгөрсөн сарын сүүлийн өдөр Хятадын Тэнгисийн цэргийн хүч үүсгэн байгуулагдсан 72 жилийн ойн баярын өдөр олон нийтэл танилцуулсан байна. Энэхүү шинэ шумбагч нь 10 мянган км алслалтай “JL-3” тив алгасагч пуужингаар зэвсэглэсэн юм байна. Энэхүү шумбагч нь өмнөх 094 төслийн сайжруулсан хувилбар бөгөөд хэт чимээ шуугиан гаргадагтай холбоотой асуудлыг амжилттай шийдэж чадсан учраас шинэ пуужингаар зэвсэглэсэн аж.

 Ингэж сайжруулахаасаа өмнө хуучин төслийн шумбагч нь АНУ-ын зөвхөн зүүн хойд хэсэгт хүрч цохилт өгөх чадвартай “JL-2” пуужингаар зэвсэглэж байжээ.

 Хятадын Тэнгисийн цэргийн хүчний бүрэлдэхүүнд “094” төслийн зургаан цөмийн шумбагч байдаг. Ойрын үед “092” төслийн хуучирсан шумбагчийг солихоор ахин хоёрыг нэмж барих төлөвлөгөөтэй байгаа гэж байна. Түүнчлэн зарим хэвлэлийн мэдээлж буйгаар Хятад удахгүй “096” төслийн шинэ үеийн шумбагч угсарч, 2030 оноос өмнө ашиглалтад оруулах төлөвлөгөөтэй байгаа аж.

 Дэлхийн дээр АНУ, ОХУ, Франц, Их Британи, БНХАУ, Энэтхэг гэсэн таван улс тив алгасагч пуужингаар зэвсэглэсэн стратегийн цөмийн шумбагч усан онгоцтой. 


Сэтгэгдэл (2)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
192.82.74.91
6 орны нэр биччихээд 5 улс гэж бичсэн байх юм. Юмаа хянахгүй мэдээлэл бичих юм.
Хариулах
103.26.195.23
ХЯТАД СССР ийн АРААС ОРОХ БИЙ ДЭЭ ККК
Хариулах