Сонгуулийн Ерөнхий хороо С.Эрдэнийн материалыг хүлээн авчээ

 М.Тулгат тэргүүтэй АН-аас С.Эрдэнэ нэр дэвшихээр сонгогдсон. Харин О.Цогтгэрэл тэргүүтэй АН-аас Н.Алтанхуяг нэр дэвшихээр болоод байсан билээ. Гэвч Сонгуулийн ерөнхий хорооноос АН-ыг дотооддоо ойлголцож, нэг нэр дэвшигч дээр тохир гэх шаардлага тавьсан. Ойлголцолд хүрч чадаагүй гэдгээ илэрхийлж, Сонгуулийн ерөнхий хорооны нэр дэвшигчийн материалыг хүлээж авахгүй гэх шийдвэрийг эсэргүүцсэн О.Цогтгэрэл тэргүүтэй АН буюу УИХ-д 13 суудалтай намын гишүүд Төв талбайд өлсгөлөн зарлан сууж байгаа юм.

АН-ын  ерөнхий нарийн бичгийн дарга Ч.Өнөрбаяр С.Эрдэнийн материалыг Сонгуулийн ерөнхий хороо хүлээн авсан талаар мэдээлжээ. Тэрбээр “АН-аас хуульд заасан баримт бичгийг Сонгуулийн ерөнхий хороонд хүлээлгэн өглөө. Сонгуулийн ерөнхий хорооноос Ерөнхийлөгчийн сонгуулийн тухай хуульд заасан бичиг баримтын бүрдлийг хангасан гэж үзээд бидний материалыг хүлээж авсан” гэв.

Харин Сонгуулийн ерөнхий хорооноос энэ талаар албан ёсны мэдээлэл хийгээгүй байгаа юм.