Афганистанд Британийн армийн талд орчуулга хийж байсан афгани орчуулагчид болон тэдний ар гэрийн хүмүүсийг Их Британийн нутагт байнга амьдрахаар нүүхийг зөвшөөрсөн тухайгаа тус улсын эрх баригчид мэдэгджээ.
Афганистан дах Британийн цэргийн ангиудыг бүрэн гарч дууссаны дараагаар орчуулагчид ба тэдний ар гэрийг Талибан бүлэглэлийн зүгээс янз бүрээр хэлмэгдүүлж магадгүй гэж болгоомжилсны үндсэн дээр ийм шийдвэр гаргаж байгаа юм байна. Их Британи ба Умард Ирландын Нэгдсэн Вант улсын Батлан хамгаалахын сайд Бен Уоллесэнэ талаар ярихдаа “Өрнөдийн улсууд Афганистаныг орхин гарахын хэрээр талибуудын санаатай дайралтын улмаас орчуулагчдын амь насанд учрах аюул өсөн нэмэгдэж байна. Нүүх зөвшөөрөл нь афган орчуулагчдыг Нэгдсэн вант улсад аюулгүй хүрэх боломж олгох юм. Британийн зэвсэгт хүчин, Британийн Засгийн газрыг олон жилийн турш Афганистанд дэмжиж ирсэн хүмүүс шүү дээ” гэжээ.
Орчуулагчийн ажилласан жил ба гүйцэтгэсэн үүрэг дээр үндэслэн Их Британи руу нүүх боломж олгож байсан арай эрт үеийн загварын дагуу олон зуун афган орчуулагч Британид суурьшаад байгаа юм байна. Гэтэл ингэж хатуу шүүлтээр шүүвэл дийлэнх афган орчуулагчдын дийлэнх нь нүүх шалгуурыг давж чадахгүй болох нь ойлгомжтой болж. Иймд афган орчуулагчдын албан тушаал эсвэл ажилласан жилийг үл харгалзаж, орчуулга хийж байсан л бол Британи рүү цагаачлах боломж олгосон шинэ хувилбарыг хэрэгжүүлж эхэлсэн нь энэ аж. Батлан хамгаалахын сайдын хэлж байгаагаар энэ шинэ хувилбарын дагуу Их Британи руу 3000 гаруй афганорчуулагч байнга оршин суухаар нүүх болоод байгаа аж.
Афганистан дах өрнөдийн орнуудын цэргийн хүч 2021 оны сүүл гэхэд бүрэн гарч дуусна. Их Британийн хувьд 750 цэргийн албан хаагч нь Афганистанд үлдээд байгаа бөгөөд дийлэнх нь Кабул хотын аюулгүй байдлыг хангах ажлыг гүйцэтгэж байгаа юм байна.
Сэтгэгдэл (0)
Сэтгэгдэл бичигдээгүй байна