“Токио-2020” зуны паралимпын наадам өнгөрсөн сарын 24-нөөс эхлэн амжилттай явагдаж байна. Харин өнөөдөр буюу есдүгээр сарын 2-ны өдрөөс таеквондогийн төрөл эхлэх гэж байна. Энэ удаагийн наадамд манай орноос анх удаа 2 тамирчин таеквондогийн төрөлд паралимпын эрхийг авч эх орноо төлөөлөн оролцож нэгэн шинэ түүхийн хуудсыг бичиж байгаагаараа онцлог болж байна. Тодруулбал, -61кг жинд Монголын пара таеквондогийн үндэсний шигшээ баг, Алдар спорт хорооны тамирчин ОУХМ Г.Болор-эрдэнэ тулалдах бол эмэгтэйчүүдийн -49кг жинд Монголын пара таеквондогийн үндэсний шигшээ баг, Алдар спорт хорооны тамирчин Х.Энхтуяа нар тулалдах хуваарьтай байна.
Манай 2 тамирчин жингээ тэргүүлж байгаа тул эхний тойрогт гоц мөргөж Х.Энхтуяа хоёрдугаар тойрогт Узбекистан болон Афганистан 2 улсын аль нэг ялсан тамирчинтай Улаанбаатарын цагаар 11 цагт дэвжээн дээр хүч үзэх бол Г.Болор-эрдэнэ хоёрдугаар тойрогт Итали болон Узбекистан улсын ялсан тамирчинтай тулалдана.
ОУХМ Г.Болор-эрдэнэгийн товч танилцуулга:
Сүхбаатар аймгийн Баруун-Урт суманд 1995 оны 03 сарын 26-нд төрсөн. 2012 оноос таеквондогийн спортоор хичээллэж эхэлсэн ба хар бүс 1-р дантай, олон улсын хэмжээний мастер, хөдөлмөрийн хүндэт медальт, Пара Таеквондогийн ДАШТ-ээс 4 алтан медаль, ААШТ-ээс 4 алтан медаль, Далайн орнуудын нээлттэй тэмцээнээс 1 алтан медаль хүртсэн. Түүнчлэн 2014 оны Дэлхийн шилдэг тамирчин, 2019 оны Дэлхийн шилдэг тулаанч цолоор шагнагдсан ба 2020 оны Токио-2020 зуны паралимпийн анхны эрхийг Монгол Улсдаа авчирсан.
Х.Энхтуяагийн товч танилцуулга:
Архангай аймгийн Их Тамир суманд 1990 оны 09 сарын 06-нд төрсөн. 2015 оноос таеквондогийн спортоор хичээллэж эхэлсэн . Хар бүс 1-р дантай, олон улсын хэмжээний мастер, алтан гадас одон, Паралимпийн хорооны алтан нар одонтой. Пара Таеквондогийн ДАШТ-ээс 1 алтан медаль, 1 мөнгөн медаль, ААШТ-ээс 4 алтан медаль, Далайн орнуудын нээлттэй тэмцээнээс 1 алтан медаль, Дэлхийн их наадмаас 1 хүрэл медаль, Европын аварга шалгаруулах тэмцээнээс 1 алтан медаль, Ким Ун Ёон ОУ-ын тэмцээнээс 1 мөнгөн медаль хүртсэн. 2017 оны Дэлхийн шилдэг эмэгтэй тамирчин, Ази Тивийн шилдэг тамирчин болно. Монголын Пара таеквондогийн холбооны шигшээ багийн тамирчин. 2017 оноос Үндэсний шигшээ багийн тамирчинаар ажиллаж байна.
Сэтгэгдэл (0)
Сэтгэгдэл бичигдээгүй байна