Нүүрсний уурхайг хаатал өдөр бүр 500 мянган еврогийн торгууль ноогдуулжээ

Люксембург дах Европын холбооны шүүхээс Польш улсын “Туров” нүүрсний уурхайг бүрэн зогсоох хүртэл өдөр бүр 500 мянган еврогийн торгууль төлөх шийтгэл ногдуулсан байна. Европын холбоонд гомдол гаргасан Чех улс болохоор Польшийг өдрийн 5 сая еврогоор торгохыг шаардаад байсан ч ийнхүү арай зөөлөн арга хэмжээ авсан аж.

 Чех нь хил залгаа Польшийн нутагт байгаа “Туров” нүүрсний уурхайг Европын холбооны баримталж байгаа бодлогын дагуу хаагаагүй тохиолдолд өөрийн нутаг дах олон тооны гол горхи бохирдож, байгаль орчинд ноцтой хохирол учрах эрсдэл үүсээд байгаа учраас Европын холбооны шүүхэд хандан уурхайг хаалгах зарга үүсгээд байсан аж. Гэвч Польш нь Европын холбооны шүүхийн шийдвэрийг биелүүлэхгүй, уурхайг хаахгүй, торгуулийг ч төлөхгүй гэж мэдэгджээ. “Туров” нүүрсний уурхайгаас олборлодог нүүрсээр нь Польшийн нийт цахилгаан эрчим хүчний 7 хувийг үйлдвэрлэдэг төдийгүй уурхайн дэргэдэх Богатыня нэртэй жижиг хотын цор ганц цахилгаан станцыг нүүрсээр хангадаг учраас хаах ямар ч боломжгүй гэжээ. Уурхайг эзэмшдэг компани нь уурхайг хаахгүй төдийгүй ойрын хугацаанд ашиглалтын талбайг нь 30 км.кв-аар өргөсгөж, бүр илүү гүнээс нүүрс олборлох төлөвлөгөөтэй, ингэж өргөсгөсөн уурхайг багаар бодож 2044 он хүртэл ашиглана гэж мэдэгдсэн байна.

 Сүүлийн үед Европын холбоонд шатдаг хийн үнэ 4-5 дахин өсөж, үүнийг дагаад шатдаг хийгээр ажилладаг цахилгаан станцуудын үйлдвэрлэдэг цахилгааны үнэ 2-3 дахин өссөн үед зөвхөн Польш гэлтгүй Европын бусад улс орнууд ч нүүрсний олборлолтоо сэргээж, нүүрсээр ажилладаг цахилгаан станцуудаа буцаан ажилд оруулах тухай ярих болсон тул Польшийн байр суурийг зөвтгөх улс ч цөөнгүй байгаа аж. Гэхдээ Польш тэргүүтэй Европын зарим улсууд шатдаг хийн ихээхэн хомсдолд орж, цахилгаан ба дулааны үнэ нь өсөөд байгаа хэдий ч ОХУ-аас шатдаг хий дамжуулах “Умардын урсгал-2” хоолойг ашиглалтад оруулахыг тууштай эсэргүүцсэн хэвээр байгаа юм. Тэд Европын холбоонд Оросын шатдаг хий ямар ч хэрэггүй учраас Оросын хий дамжуулах хоолой нь эдийн засгийн бус цэвэр улс төрийн шинжтэй төсөл гэж эсэргүүцсээр байгаа юм.