Хэрэглэгчдэд болзол тулгаж, шатахуун борлуулсан компанийг 20 сая төгрөгөөр торгожээ

ШӨХТГ-өөс шатахууны борлуулалт хязгаарлалттай байгаа энэ үед хэрэглэгчдэд болзол тулгаж худалдаалалт хийсэн "Синчи фүүдс" ХХК-д 20 сая төгрөгийн торгууль ногдуулжээ. Тус компани нь өөрийн нэрийн "Махлаг" махны төрөлжсөн мухлагаас худалдан авалт хийсэн тохиолдолд "Супер 92" шатахуун түгээх станцаас 40 мянган  төгрөгийн шатахууны талон олгож байна гэх үйлдэлд есдүгээр сарын 23, 24-ны өдөр хяналт, шалгалт хийсэн байна. Шалгалтаар дээрх үйлдэл нь Зөрчлийн тухай хуулийн 10.7 дугаар зүйлийн 4.7 дахь хэсгийг зөрчсөн нь тогтоогдсон тул 20 сая төгрөгийн торгууль оногдуулав хэмээн ШӨХТГ-аас мэдээллээ.

Зөрчлийн тухай хуулийг 10.7 дугаар зүйлийн 4.7 дахь хэсэгт: -Хууль ёсны ашиг сонирхолд харшлах, эсхүл хэрэглэгчийг хууль бусаар хохироох худалдааны арга хэрэглэх үйл ажиллагаа явуулсан нь эрүүгийн хариуцлага хүлээлгэхээргүй бол хууль бусаар олсон хөрөнгө орлогыг хурааж, учруулсан хохирол, нөхөн төлбөрийг гаргуулж хүнийг хоёр мянган нэгжтэй тэнцэх хэмжээний төгрөгөөр, хуулийн этгээдийг хорин мянган нэгжтэй тэнцэх хэмжээний төгрөгөөр торгоно гэж заажээ.