“Спикер”-лүү улангассан талууд тохиролцоонд хүрч чадахгүй байна

Н.Учрал танхимаа бүрдүүлж чадахгүй хоёр хонолоо. УИХ даргагүй гурав хонолоо. МАН тохирч чадахгүй, өрөө дамжин хэсээд чуулганы ирц тааруу, төр засгийн ажил назгайрчээ.

Энэ нь нөгөө МАН-ын дотоод зодоонтой холбоотой. Нэг танхимд хэл амаа ололцож чадахгүй, хоорондоо гар зөрүүлж шившгээ тарьж, эрх баригчид нохой мэт уралцахыг ард түмэн хоёр нүдээрээ тод гэгч нь харлаа. УИХ дахь МАН-ын бүлэг хатуу хоёр хуваагдаад долоон сар болж байна. Ойлгомжтой байлгах үүднээс Монгол Улсын Ерөнхийлөгч У.Хүрэлсүхийн талыг 38 гэж нэрлэе. Харин УИХ-ын гишүүн Д.Амарбаясгалан, Л.Оюун-Эрдэнэ нарын талыг 30-ын тал гэж нэрлэе.

Өчигдөр орой хоёр тал хоорондоо шөнө дөл болтол уулзсан. Ингэхдээ “30”-ын тал УИХ-ын даргаар С.Амарсайхан, Ж.Бат-Эрдэнэ хоёрын нэгийг томилуулъя, бидэнд сайдын суудал хэрэггүй гэсэн. Харин нөгөө тал буюу “38” тал нь Г.Тэмүүлэн, А.Ариунзаяа, Ж.Бат-Эрдэнэ, Ц.Сандаг-Очир, Л.Мөнхбаатар нарт сайдын суудал өгье, УИХ-ын даргаа бид өөрсдөө томилно гэж сөргүүлжээ. Хэн хэн нь УИХ-ын даргын суудал руу улайрсан учир хоёр шийдэлд хүрч чадалгүй, тарцгаажээ.