Махны экспорт нэмэгдсэн нь дотоодод махны үнэ өсөхөд нөлөөлөв үү

Манай улс жил бүр 60, 70 сая мал тоолуулдаг ч хаврын хаварт махны үнэ тэнгэрт хадаж, иргэд махаа худалдаж авч чадахгүйд хүрдэг. Энэ жил бүр ч онцгой байна. Нийслэлчүүд өнөөдөр нэг кг махыг 16-32 мянган төгрөгөөр худалдан авч байна. Зарим худалдааны төвүүдэд үхрийн мах нэг кг нь 32 мянган төгрөг давсан нь иргэдийн бухимдлыг төрүүлж буй юм. 

Үндэсний статистикийн хорооны мэдээллээр мах, махан бүтээгдэхүүний үнэ өмнөх сартай харьцуулахад дунджаар 3.5 хувиар өсжээ. Тухайлбал, энэ оны гуравдугаар сарын байдлаар хонины ястай махны үнэ 4.4 хувиар, үхэр болон ямааны махны үнэ тус бүр 2.1 хувиар нэмэгдсэн үзүүлэлт гарсан байна. Махны ченжүүд энэ жилийн өвөл бэлтгэсэн махны нөөц хангалтгүй байгаа нь махны үнэ өсөхөд нөлөөлсөн хэмээн ярьж байна. Махны нөөц хангалтгүй болсон шалтгаан нь мах, махан бүтээгдэхүүний нөөц нэмэгдсэнтэй холбоотой. Өмнө жилүүдэд дунджаар 60-65 мянган тонн мах экспортолдог байсан бол энэ жил манай улс хамгийн их буюу 85 мянган тонн мах экспортолжээ. Хөдөө аж ахуй, хөнгөн үйлдвэрийн яам дотоодын нөөцөө бүрэн тооцож чадаагүйн горыг өнөөдөр нийтээрээ амсаж байна.