ХӨСҮТ: Улаанбурхан өвчнөөр 15 хүн нас барлаа

Улсын хэмжээнд Улаанбурхан өвчний батлагдсан тохиолдол 14,561-д хүрчээ. Үүнээс нийслэлд 11,759, орон нутагт 2,797 тохиолдол бүртгэгдээд байгаа бөгөөд нас баралт 15-д хүрчээ.

2026 оны дөрөвдүгээр сарын 5-ны байдлаарх Халдварт өвчин судлалын үндэсний төв-ийн мэдээллээр шинэ тохиолдол нэмэгдээгүй ч эмнэлэгт хэвтэн эмчлүүлж буй 64 хүн байна. Тэдний 38 нь нийслэлд, 26 нь орон нутагт эмчлүүлж байгаа аж.

Өвчлөл насны бүлгээр авч үзвэл 10–14 насныхан хамгийн өндөр буюу 5,265 тохиолдолтой байна. Мөн 0–4 насны 3,578, 5–9 насны 1,855, 15–19 насны 1,796 хүүхэд улаанбурханаар өвчилжээ.

Улаанбурхан нь халдварлах чадвар өндөр ч вакцинаар бүрэн сэргийлэх боломжтой халдварт өвчин юм. Иймд иргэд вакцинд хамрагдсан эсэхээ харьяа эрүүл мэндийн байгууллагад шалгуулж, шаардлагатай тохиолдолд нөхөн дархлаажуулалтад хамрагдахыг мэргэжлийн байгууллагууд зөвлөж байна.